Timor Oan Nain Sanulu Ne'ebé husi parte Sefope haruka ba tuir formasaun iha Bali iha area hotelaria nian.Imajen /Costa

DILI, 15 novembru 2019 (TATOLI) – Sekretáriu Estadu Formasaun Profisionál no Empregu (SEPFOPE, sigla portugés) serbisu hamutuk ho Hotel Novo Turismo hodi halo selesaun ba joven hamutuk na’in-10 atu haruka bá tuir formasaun kona-ba área otelaria nian iha Bali, Indonésia.

“Formasaun ba área otelaria hanesan polítika Governu nian, atu kapasita joven sira sai profesionál, oinsá joven sira iha koñesimentu ne’ebé di’ak hodi bele asesu kampu serbisu”, Diretór Jerál SEPFOPE, Paulo Alves, ba Ajénsia Tatoli hafoin remata enkontru ho benefisiáriu na’in-10, iha salaun SEPFOPE, Kaikoli, ohin.

Paulo Alves adianta joven hirak ne’e sei aranka iha novembru 2019, hodi bá tuir formasaun durante fulan neen iha Indonézia.

Kona-ba selesaun, nia esklarese katak prosesu ne’e SEFOPE serbisu hamutuk ho Hotel Novo Turismo atu hili, hafoin deside na’in-10 sai benefisiáriu ba programa formasaun.

Iha fatin hanesan, Diretór Operasionál Hotel Novo Turismo, Santonino Pereira, akresenta joven sira ne’ebé haruka bá rai-li’ur, ida ne’e programa anuál, SEFOPE fó fiar mai Hotel Novo Turismo atu halo selesaun hafoin haruka bá tuir formasaun.

Nia salienta katak joven hirak ne’e halo selesaun hosi Novo Turismo, sira mai husi sentru formasaun iha Dili laran, sira ne’e iha área otelaria nian, bainhira joven sira ne’e maka aprende ho di’ak ka sériu hodi lori rezultadu di’ak mai, maka Novo Turismo sei foti sira serbisu iha ne’e.

“Ami sei aproveita sira bainhira sira aproveita di’ak formasaun, ami sei la husik tanba ida ne’e iha ami-nia kompromisu ho SEFOPE liuhosi selesaun ba joven sira”, afirma.

Nune’e mós, Diretora Ezekutiva Fundu Dezenvolvimentu Kapitál Umanu (FDCH, sigla portugés), Leila Carceres, mensiona orsamentu ba formasaun sira ne’e, prevee rihun $71.

Benefisiáriu Lia de Fátima Soares Ferreira, kompromete sei hatudu komportamentu di’ak no aproveita formasaun ho di’ak tuir saida maka parte SEFOPE dehan.

Benefisiáriu na’in-10 ne’e sei tuir treinamentu iha Sekolah Tinggi Pariwisata Bali.

Notísia relevante : SEFOPE-STP Bali Asina Memorandu ba Formasaun iha Área Ospitalidade

Jornalista : Natalino Costa 
Editora : Maria Auxiliadora

HAKEREK NO HATÁN

Please enter your comment!
Please enter your name here