Sea Games 2019. Imajen Espesiál

DILI, 16 novembru 2019 (TATOLI) – Atleta timoroan hamutuk na’in-60 hosi modalidade 12, sei reprezenta Timor-Leste hodi partisipa iha jogu Sudeste Aziátiku (Sea Games) ba dala-30, ne’ebé sei hala’o iha Manila, Filipina iha loron 30 novembru to’o 11 dezembru.


Tanba ne’e, ohin reprezentante atleta akompaña hosi Ministra Edukasaun Juventude no Desportu, Dulce de Jesus, Vise-Prezidente Komite Olímpiku Nasionál Timor-Leste (CONTL-portugés), despede Primeiru-Ministru (PM), Taur Matan Ruak, hodi tempu besik bele aranka no partisipa iha eventu internasionál ne’e.

“Ohin mai hasoru Primeiru-Ministru hodi halo despedida tanba atleta hirak ne’e ba reprezenta nasaun. Durante ne’e, sira hala’o ona preparasaun ho másimu. Iha preparasaun durante fulan haat nia laran uza osan Estadu nian hamutuk $450.000, ne’ebé maka uza ona metade $100.000 ba faze preparasaun ninian. Entaun sira mós sei iha orsamentu naton hodi partisipa iha eventu ne’e”, tenik Dulce iha Palásiu Governu, sesta ne’e.

Governante ne’e haktuir, durante hasoru malu, lia menon hosi Xefe Governu di’ak tebes ba atleta sira no haree hosi limitasaun ne’ebé Timor-Leste iha liuhosi preparasaun ne’ebé ladún másimu maibé atleta sira iha nafatin vontade atu lori rezultadu pozitivu.

“Timor-Leste la’os foin maka partisipa iha eventu ne’e, maibé iha tinan sira ba kotuk mós partisipa ona no atleta balun hatudu duni prestasaun hodi hetan medalla iha eventu boot sira”, nia subliña.

Entretantu, modalidade 12 ne’ebé sei partisipa ne’e mak hanesan, Futeból, voleiból Praia, Siklizmu, Atletizmu, Natasaun, Tiru, Boxe, Taekwondo, Karate, Silat, Ténis Meza no Crossfit.

Jornalista: Hortençio Sanchez 

Editór: Xisto Freitas

HAKEREK NO HATÁN

Please enter your comment!
Please enter your name here