Prezidente Federasaun Natasaun Timor-Leste, Laurentino Guterres. Imajen TATOLI/ Cipriano Colo

DILI, 15 novembru 2019 (TATOLI)–Prezidente Federasaun Natasaun Timor-Leste (FNTL), Laurentino Guterres otimista katak atleta na’in-rua husi Federasaun Natasaun ne’ebé selesionadu ba partisipa iha Sea Games sei lori rezultadu di’ak tanba durante ne’e halo preparasaun di’ak. 

Laurentino dehan atleta selesionadu na’in-rua ne’e mak hanesan Domingos da Silva Belo ho Imelda Felizita Ximenes Belo.

Kona-ba preparasaun, Laurentino haktuir, durante ne’e atleta na’in-rua hamutuk ho treinadór timoroan ida ho naran Manuel da Silva Belo hala’o preparasaun ho treinamentu rutina iha fatin rua hanesan Baucau no Dili.

Lee mós: Xefe Estadu Husu Atleta Sira Disiplina Durante Jogu Sea Games

Nia esplika, treinamentu ida iha Baucau uza pisina ida iha ne’ebá la’ós standar liu, maibé pisina di’ak, no ida iha Dili ne’e tanba sei eskola, nune’e treinu uza pisina ida iha Golgota, Comoro.

“Sira na’in-rua treinu di’ak tanba iha fulan jullu liubá ne’e hetan treinadór internasionál husi Austrália, ho tékniku di’ak. Tanba sira ne’ebé atu ba ne’e sira selesionadu iha jogu olímpiku ba tinan 2020”, Laurentino informa preparasaun ne’e hafoin hamutuk ho kontijente despede Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Laurentino hatutan, atleta sira ne’e treinadu durante fulan haat komesa kedas husi janeiru to’o iha juñu liubá no atleta sira mós partisipa iha kampionatu mundiál iha Huan Ju, Koreia Súl.

“Atleta sira halo preparasaun di’ak tanba atleta Domingos antes ne’e iha ninia record hetan minutu 30 ba pisina ho medida metru 50. Maibé, semana kotuk, ita halo teste ka koko tan, iha mudansa, tanba nia halo de’it minutu 28 ba pisina ho medida metru 50. Ida-ne’e sinál ida ne’ebé di’ak ba ita”, Laurentino esplika.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here