DILI, 14 novembru 2019 (TATOLI)-Autoridade Jestaun Merkadoria Munisípiu Dili, seidauk bele negosiante fa’an ropa uzadu (Obralan/OB) iha area Ai-mutin, tanba sei halo hela identifikasaun ba fatin ka espasu mamuk iha Merkadu Manleuana.
Notísia Relevante : Vendedores Ai-mutin Sei La Hamamuk Area Fa’an Obralan
Xefe Jestaun Merkadoria Munisípiu Dili, Berta Santa Gonçalves, informa, to’o agora negosiante sira ropa uzadu sei provizoriamente hala’o sira nia atividade negósiu iha Ai-mutin hodi hein fatin permanente ne’ebé sei identifika iha area Merkadu Manleuana.
“Ami seidauk identifika fatin mamuk iha Merkadu Maleuana ba ita-nia negosiante Ai-mutin sira,” informa Berta Santa Gonçalves, hodi responde Ajénsia TATOLI via telefone, ohin.
Nia dehan, to’o Munisípiu Dili hetan ona fatin própriu ba negosiante ropa uzadu sira iha Ai-mutin, maka sei halo avizu ka alerta ida molok muda sai sira ba fatin ne’ebé merese no dignu.
Jornalista : Osória Marques
Editór : Francisco Simões
