Peskadór Bendito Alves Pereira. Imajen/Egas Cristovão.

LIQUIÇÁ,14 novembru 2019 (TATOLI) — Peskadór Bendito Alves Pereira, hateten vida peskadór nakonu ho konsekuénsia bainhira laloran tasi ne’e boot.

Bendito (35) hosi suku Maumeta, aldeia Darmudepu, Postu Administrativu Liquiçá, Munisípiu Liquiçá, envolve iha atividade peska dezde 1998.

“Atividade peska ne’e risku bainhira laloran tasi nian boot, maibé pasiénsia de’it tanba ita-nia moris mak ne’e ona, kadavés ita triste uitoan, dalaruma la triste tanba ita toman ona, saida mak akontese ita tenke simu konsekuénsia tanba vida peska ne’e hanesan ne’e”, nia dehan ba Ajénsia Tatoli iha tasi-ibun Maumeta, Liquiçá, kuarta ne’e.

Peskadór ne’e kada loron sempre hala’o atividade peska iha área tasi-ibun Maumeta nian, no hetan ikan barak bainhira iha tempu di’ak.

“Atu hetan rendimentu di’ak konforme kondisaun tasi de’it, bailoron hanesan kadavés hetan, ezemplu hanesan ohin loron ha’u kona dólar 27. Se tempu di’ak bele kona dólar 50 ka 60 ou tempu di’ak liu ne’e bele to’o dólar 100. Osan sira ne’e uza ba sustenta família uma-laran, tau hamutuk hola fali rede foun no osan balun selu labarik sira-nia eskola”, katak nia.

Nia haktuir, durante ne’e seidauk hetan apoia hosi Governu kona-ba fó no rede, maibé sosa rasik mak hala’o atividade peska.

“Ami hato’o proposta ba Governu, maibé la fó resposta mai ami, kadavés suku sira seluk hato’o proposta simu, ami-nia proposta Governu la fó resposta. Kadavés ema balun uza ami-nia eleitorál hodi simu ró no rede, ami laiha”, dehan nia.

Proposta ne’e sira hato’o ba Governu liuhosi Ministériu Agrikultura no Peska (MAP) kleur loos ona, maibé laiha resposta.

Dezde sai peskadór iha 1998 sustenta de’it nesesidade família no oan sira bá eskola, sustenta ba buat seluk laiha, tanba rendimentu hosi atividade peska ne’e ladún barak.

Peskadór balun ne’ebé lori nia rezultadu peska atu fa’an iha tasi-ibun Maumeta. Imajen/Egas Cristovão.

“Atividade peska ne’e importante tanba ita halo buat seluk labele, tanba ita iha talenta ba peska de’it, servisu seluk laiha”.

Nia dehan, bainhira hetan ikan barak bele fa’an iha área Liquiçá nian no bele lori bá kapitál.

“Fa’an iha Dili di’ak liu, tanba iha Liquiçá fa’an ualu ka 10 dólar ida, maibé iha Dili neen no ualu dolar-rua. Ida mós ita sukat ba karreta ne’e hanesan de’it, ita lakon fali transporte bá-mai, kadavés sira hosi Dili mai hola to’o iha ne’e, dalaruma ami fó labarik sira mak fa’an depois ami fó porsentu ba sira”, katak.

Peskadór Bendito iha oan na’in-haat, sei iha ensinu primária hela.

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here