Estudante no profesór hasai foto hamutuk, iha ámbitu komemorasaun loron mundiál ba labarik. Imajen: Felicidade Ximenes

DILI, 14 novembru 2019 (TATOLI)—Vise-Ministra Soliedariedade Sosiál no Inkluzaun, Signi Verdial, hateten ekonomikamente sosiedade Timor-Leste ne’e sei iha rendimentu ne’ebé menus husi standar (padraun) maibé husu ba inan-aman sira atu labele utiliza labarik sira atu hakonu rendimentu família nian hodi haruka labarik sira ba fa´an iha luron ninin.

Vise-Ministra Solidariedade Sosiál no Inkluzaun, Signi Chandrawati Verdial. Imajen/Nelson de Sousa

Nia hatutan, inan-aman tenke iha obrigasaun ba oan sira oinsá mak atu hakonu direitu labarik ida ne’e liga ho situasaun ekonomia. Tanba, tuir nia, Estadu Timor-Leste mós iha programa lubuk ida husi liña Ministeriál sira ezemplu Ministériu Solidariedade Sosiál no Inkluzaun hanesan iha programa bolsa da mãe ba labarik sira.

Bolsa da mãe ne’e atu responde ba família kbiit laek sira ne’ebé ekonomia natoon para sustenta sira-nia oan hodi asesu ba edukasaun,” dehan Vise-Ministra Soliedariedade Sosiál no Inkluzaun, Signi Verdiál, ba jornalista sira hafoin semináriu nasionál Loron Mundiál Ba Labarik ne’ebé hala’o iha Salaun Luz Clarita, kinta (14/11/2029).

Entretantu, nia haktuir, Ministériu Edukasaun kria tan eskola públika gratuita, ida ne’e hanesan Governu nia polítika atu responde ba situasun sira hanesan ekonomia família Timór nian sei fraku no rendimentu kada uma-kain ida kada loron ne’e menus husi rendimentu ekonomia ne’ebé la tuir padraun moris lorloron nian.

Tanba, nia haklaken, Timor-Leste seidauk iha Lei Ba Presaun Labarik no ida mós ita seidauk iha kódigu ba labarik. Lei rua ne’ebé mak sai hanesan lei ida ne’ebé fó protesaun másima ba labarik sira.

Iha parte seluk, nia dehan, konsiénsia ema ida-idak nian presiza hasa’e liután mak konsiénsia ema ida-idak nian hodi trata labarik ne’e hanesan ema. Iha ne’e, oinsá mak ema ida-idak bele trata labarik sira hanesan ema, presiza hasa’e konsiénsia sosiedade nian atu komprende oinsá mak labele trata labarik sira ho violénsia.

Parte Governu, tuir nia, rekoñese halo esforsu barak maibé to’o ohin loron sei enfrenta situasaun ida ne’e hanesan violénsia ba labarik sei mosu nafatin. Violénsia mosu tanba dalaruma kondisaun fatin ba sira iha eskola-fatin hanesan haris-fatin ne’ebé la adekuadu bele kontribui violénsia ne’e mosu ba labarik sira.

“Atu halo ida ne’e, Estadu de’it sei labele. Ita tenke sura ho ita-nia parseiru hotu-hotu husi baze to’o nasaun seluk. Tanba ne’e mak ita fó hanoin fila fali aleinde ita selebra tinan-30 ba konvensaun rejionál ne’ebé ita-nia polítiku na’in sira promete ona atu implementa,” Vise-Ministra Soliedariedade Sosiál no Inkluzaun ne’e hateten.

Nia hatutan, daudaun ne’e Governu nia serbisu mak oinsá atu kria kondisaun hotu-hotu atu hamenus mortalidade hodi haree katak ita-nia oan sira ba eskola ka lae nomós haree ba sira-nia direitu moris ne’e, oinsá bele iha espasu ba sira atu espresa sira-nia hanoin no fó epasu espasu ba sira para atu hola parte ba dezenvolvimentu.

“Hanesan mós ita-nia parseiru sira. Saida mak parseiru sira atu ajuda ita-nia Governu sira para realiza ita-nia labarik sira-nia direitu iha dezenvolvimentu Nasionál,” nia dehan.

Partisipante sira ne’ebé mak partisipa iha serimónia Loron Mundiál ba Labarik ne’e mak Vise Ministra Solidariedade Sosiál no Inkluzaun, Reprezentante UNICEF iha Timor-Leste, Diretora Jerál Prestasaun Saúde, Adjuntu Prokuradór Jerál Repúblika, Lider komunitáriu sira no mós estudante sira husi Ensinu Báziku Terseiru Siklu Esperança da Pátria Becora,  Eskola EBC Bidau Akadiruhun, Eskola Báziku Terseiru Siklu Kristal no Eskola Báziku Terseiru Siklu 10 Dezembru Comoro.

Notísia relevante:Labarik TL Na’in Rua Sei Partisipa Loron Mundiál Ba Labarik Iha Bangkok

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here