Ministru Negósiu Estranjeirus no Kooperasaun Dionísio da Costa Babo Soares. Imajen: António Gonçalves

DILI, 14 Novembru 2019(TATOLI)- Ministru Negósiu Estranjeiru no Kooperasaun (MNEK), Dionísio Babo Soares hateten, Timor-Leste presiza reforsa instituisaun estadu nian tanba konsidera katak instituisaun estadu sei frajil hela.

“Agora ita presiza refosa instituisaun estadu tanba sei frajil hela, ezemplu agora mosu impase politíka, ida ne’e ba nasaun demokrátiku normál problema bele mosu maibé governu no estadu la’o nafatin tanba instituisaun sira tasak ona,” akresenta Ministru Dionísio Babo Soares, iha ámbitu Konferénsia Internasionál ODS 16, ohin, iha Edifísiu Ministériu Finansa.

Governante ne’e realsa katak ho diferénsia ne’ebé Timor-Leste enfrenta presiza serbisu maka´as liu atu haforsa instituisaun ba dezenvolvimentu nasaun nian ho di’ak.

“Tanba ne’e maka diferénsia sira ne’e ita atu rezolve susar tebes, ho ida ne’e maka tenke presiza serbisu maka´as liután para bele halo forsa liután instituisaun sira ne’e hodi bele sai tasak liután, kuandu instituisaun forte, lideransa forte,  nasaun ne’e bele dezenvolve ho di’ak,” tenik Governante ne’e.

Iha nasaun barak ne’ebé partisipa iha Konferensia ODS ne’e, tuir diplomata Dionísio Babo Soares, la imajina Timór bele to’o iha faze ida nune’e maibé ho esforsu barak ne’ebé Timor-Leste halo maka ohin loron bele atinje iha faze ida ne’e.

“Ohin hau rona hosi ema hotu ko´alia ho ha´u hateten katak sira nunka imajina katak ita bele to’o iha faze ida ne’e. Maibé, ezemplu ne’ebé hatudu ita la’o to’o iha faze ida ne’e maka  PNDS, kona ba movimentasaun setór privadu, mobilizasaun sosiedade sivíl, kona-ba planu stratéjiku ne’ebé buat barak integra  iha laran, ida ne’e sira hotu hakfodak katak Timor-Leste iha kondisaun hotu atu adianta,” dehan ministru.

Ministru Babo esplika,  durante tinan hira nia laran Timor-Leste halo serbisu maka´as tebes mezmu ema barak la haree maibé hatudu katak ita mai hosi situasaun ne’ebé difísil, situasaun ida ne’ebé maka konflitu naruk tebes, fasilidade instituisaun nian sei maka´as tebes maibé ita konsege atinje buat lobuk ida.

Ezemplu ita-nia sosiedade sivíl forma pilár ida importante tebes hanesan parseiru governu nian la’ós halo de’it serbisu maibé halo mós kontrolu liu hosi sosiál audit, buat ida ne’ebé maka nasaun barak mai ne’e barak laiha

Segundu iha setór privadu ne’ebé  foin komesa kikoan hela maibé komesa serbisu maka´as ona atu ajuda governu, ezemplu ho joven kestaun empregu, rezolve parte dezenvolvimentu ne’ebé maka governu labele hala’o ho buat seluk ne’ebé maka sira mós envolve mezmu foin komesa maibé ho situasaun ida ne’e ita hatudu ba ita-nia parseiru sira katak ita mós konsege to’o ona iha faze ida  sira barak seidauk.

Terseiru, ita hatudu ba sira kona-ba prosesu dezenvolvimentu ne’ebé maka ita halo, ne’ebé ita halo iha espiritu rekonsiliasaun nasionál nian. Buat ne’e hotu sai hanesan pre-rekizitu ka kondisaun atu dehan katak só kuandu depois mai hosi situasaun konflitu ida naruk tebes ita tenke garante katak iha pás, estabilidade no ho ida ne’e maka ita iha dezenvolvimentu. “Se laiha pás no estabilidade ita labele iha dezenvolvimentu,” friza diplomata timoroan ne’e durante entrevista ho jornalista sira.

Ministru Negósiu Estranjeiru no Kooperasaun (MNEK), Dionísio Babo Soares hateten tan, rekonsiliasaun Timor-Leste kona-ba Unidade Nasionál halo hotu iha “estate building” ka konstrusaun estadu ho lideransa vizionariu ne’ebé tuir planu bele lori Timor-Leste ba iha rendimentu nivél altu iha tinan 2030.

o que certo é Timor-Leste nia konseitu kona-ba rekonsiliasaun no unidade nasionál ne’e halo hotu iha espíritu ida iha state building no nation building (konstrusaun nasaun) nian tanba ita iha lidér vizionariu, iha planu estratéjiku ne’ebé ita sente katak bele lori nasaun ne’e ba sai país ho rendimentu nivél altu iha 2030. Ita iha lidér forte no populasaun ne’ebé komprende hakarak atu serbisu hamutuk hodi dezenvolve ita- nia rain,” rekoñese Ministru Dionísio Babo Soares.

Jornalista: Nelia Borges

Editór     : Rafy Belo

HAKEREK NO HATÁN

Please enter your comment!
Please enter your name here