Operasaun Konjunta ne'ebé inisia hosi KAK ba veíkulu Estadu ne’ebé halo movimentu iha loron ferias, Sábadu ho Domingu. Imajen/Espesiál KAK

DILI, 14 novembru 2019 (TATOLI)-Funsionáriu Públiku ida ho inisiál FS hosi Diresaun Nasionál Saúde públiku, Ministériu Saúde, tenke simu títulu arguido hosi Ministériu Públiku tanba utiliza patrimóniu Estadu (motor) iha la’ós loron servisu (domingu-red) ba vizita nia prima ne’ebé baixa hela iha Ospitál Nasional Guido Valadares (HNGV-sigla portugés).

Notísia Relevante : Komete Pekulatu de Uzu, TDD Julga Funsionáriu SEJD

Arguido FS kondús motor ne’e iha domingu,  02 juñu 2019, ba haree nia prima ne’ebé halo hela tratamentu iha HNGV. Hotu tiha, nia lori motor halai kruza sa’e ba dirasaun Kulu-Hun nian.

Momentu ne’ebá nia tama operasaun konjunta Komisaun Anti Korrupsaun (CAC-sigla portugés), Polisia Nasional Timor-Leste (PNTL), Unidade Tránzitu ho Patrimóniu Estadu, prende nia motor ho xapa matrikula 7483 G tanba la iha karta autorizasaun (guia de marsa).

Notísia Relevante : Tribunal Absolve Konsultór ADN Husi Krime Pekulatu de Uzu

Mezmu nia aprezenta razaun balun tanba urjente ba haree nia prima moras, maibé ekipa konjunta kontinua halo apreensaun tanba konsidera viola lei no regra utilizasaun patrimóniu Estadu iha loron domingu hanesan loron feriadu.

Kazu pekulatu de uzu ne’e, ohin, atu halo julgamentu iha Tribunal Distritál Dili (TDD), maibé Juiza titular Edite Palmira, deside adia julgamentu ba fali loron 19 novembru 2019, tanba testemuña la notifikadu, nune’e la marka prezensa iha audiénsia julgamentu.

Juiza Edite Palmira husu ba ofisial justisa atu notifika testemuña hodi bele mai partisipa iha julgamentu tuir mai ne’ebé determinadu ona.

Arguido hanesan autór ba krime pekulatu ne’ebé previstu iha artigu 296 husi Kódigu Penal Timor-Leste.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here