Komandante Unidade Espesiál Polisia (UEP), Superintendente Xefe Afonso dos Santos. Imajen/MI

DILI, 14 novembru 2019 (TATOLI)-Komandante Unidade Espesiál Polisia (UEP), Superintendente Xefe Afonso dos Santos, prontu lori nia membru sira atu koopera ho Polisia Militár (PM), FALINTIL-Forsa Defeza Timor-Leste (F-FDTL) atu rezolve konflitu ki’ik ne’ebé akontese entre membru parte rua, foin lalais ne’e.

Notísia Relevante : Dezentendimentu PM ho BOP La Afeta ba Unidade Forsa Rua

“Ami prontu atu koopera para rezolve problema ne’e, tanba instituisaun rua ne’e mak servisu atu defende Estadu no povu,” hateten Afonso  dos Santos, ohin, ba jornalista iha Komandu UEP Bairru-Pité Dili.

Nia rejeita informasaun ne’ebé oras ne’e sirkula iha públiku katak, konflitu entre pesoál  membru UEP ho PM tanba orientasaun hosi komandu. Tanba ne’e, nia husu atu ema hotu hato’o informasaun ho loloos atu la bele fó sala ba malu no fó sala ba komandu.

Notísia Relevante : Komandu F-FDTL no PNTL Sei Foti Desizaun ba Komandante Ne’ebé Apoiu Membru Baku Malu

Kona-ba ejijénsia balun atu membru hirak husi UEP ho PM ne’ebé envolve iha problema ne’e husu deskulpa ba públiku, Afonso dos Santos, hateten, Komandante Jerál Polísia Nasionál Timor-Leste (PNTL) Komisáriu Faustino da Costa no  Xefe Estadu Maiór Jenerál F-FDTL, Major Jenerál Lere Anan Timur mak iha kompeténsia hodi orienta ba subordinadu sira hodi ezekuta orden komandu.

Afonso mós klarifika katak, bainhira kazu ne’e akontese iha loron 2 novembru 2019, nia rasik la iha Dili no simu informasaun hosi segundu komandante PNTL hodi fó orden ba segundu komandante operasaun UEP hodi retira membru sira evita konflitu iha altura ne’ebá.

Nia esplika, too agora membru UEP no PM mós kontinua halo hela koordenasaun servisu di’ak para garante nafatin lutu seguransa tuir Konstituisaun RDTL artigu 147 kona-ba knaar  polisia ho forsa seguransa  defende legalidade demokrátika no garante seguransa interna ba sidadaun hotu no la inkilina ba partidu no prevensaun krime tenke bazeia ba respeitu direitu umanu no lei maka determina regra no regulamentu  ba polisia no forsa seguransa no forsa sira seluk.

Afonso hatutan, bainhira kazu ne’e akontese, membru forsa rua tuur hamutuk rezolve kedas. Nune’e husu ba públiku atu labele pániku.

“Ha’u agradese ba ha’u nia membru, tanba problema akontese sira rezolve kedas iha terrenu,” hateten Afonso dos Santos.

Notísia Relevante : F-FDTL-PNTL Kompleta Malu Mantein Seguransa

Jornalista : Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here