DILI, 14 novembru 2019 (TATOLI)-Komisaun Anti Korrupsaun (CAC-sigla portugés), to’o ohin, ezekuta ona orsamentu jerál estadu (OJE) 2019 porsentu 67.4 hosi totál orsamentu $1,372,765.00 ne’ebé ezekuta ba saláriu no vensimentu, bens servisu no kapitál menór.
Notísia Relevante : KAK Iha Prioridade Haat Ba 2019
Tuir dadus ne’ebé TATOLI asesu hosi portál transparénsia katak, OJE 2019 ba instituisaun KAK hamutuk $1,372,765.00 ne’ebé fahe ba kompromisu $23,093.00, obrigasaun sira $33,483.15, atuál $892,421.05, saldu $423,767.58.
Komisáriu Komisaun Anti Korrupsaun, Sergio Hornay, Kuarta (13/11/2019) iha Mataduro, Dili, informa, ezekusaun orsamentu bazeia ba planu no prioridade instituisaun nian, tanba ne’e garante sei ezekuta hotu to’o iha tinan ikus 2019.
Durante tinan ne’e, KAK ninia alvu servisu iha prioridade rua, dahuluk maka hametin asesu justisa hodi garante diretu liberdade fundamentál sidadaun sira nian tuir prinsípiu legalidade no objetividade.
Notísia Relevante : KAK Aprezenta Programa Tinan Lima ba Xefe Estadu
Daruak, maka asegura governasaun di’ak iha planu asaun anuál no planu estratéjiku dezenvolvimentu nasionál.
Iha parte seluk, proposta OJE 2020 ba KAK propoin osan millaun $1.8 hodi ezekuta ba saláriu vensimentu, bens servisu no kapitál menór.
Kona-ba planu prioridade KAK iha tinan oin, Komisáriu, Sergio Hornay, relata, sei konsentra no konsolida ba promove asaun prevensaun iha área investigasaun kriminál nomos hametin kooperasaun ho instituisaun estadu sira seluk.
Jornalista : Nelson de Sousa
Editór : Francisco Simões
