DILI, 14 novembru 2019 (TATOLI) – Governadór Banku Sentrál Timor-Leste (BCTL-sigla portugés), Abraão de Vasconselhos, konsidera Proposta Lei Orsamentu Jerál Estadu (OJE) 2020 boot tanba Governu iha duni nesesidade atu halo investimentu.
Orsamentu 2020 ho montante biliaun $1,950, inklui impréstimu millaun $73, foti hosi Fundu Petrololíferu hamutuk biliaun $1,466, enkuantu Governu kontinua foti liu Rendimentu Sustentável Estimadu (RSE) ne’ebé ho kalkulasaun millaun $536,8, nune’e foti liu RSE hamutuk millaun $929,9.
“Situasaun agora diferente tanba nesesidade atu halo investimentu iha Kosta Súl aumenta, Greater Sunrise no iha setór seluk tan, konserteza ninia implikasaun sei iha”, tenik Abraão, hafoin enkontru ho Prezidente Repúblika, Francisco Guterres Lú Olo iha Palásiu Prezidensiál, kinta ne’e.
Nia esplika, montante orsamentu ne’ebé Governu foti boot ka ki’ik, ninia impaktu sempre iha.
“Governu atu foti osan liu ka la liu husi porsentu ne’ebé fundu iha, impaktu sempre iha tanba fonte finansiamentu ba OJE iha Timor-Leste prinsipál liu maka Fundu Petrolíferu”, nia akresenta.
Nune’e, nia hatutan, kualkér alterasaun iha Fundu Petrolíferu sempre iha implikasaun direta mai Timór, liuliu bainhira Governu hakarak utiliza fundu ne’e hodi finansia atividade Estadu.
“Ne’e hanesan kestaun tanba dependénsia ba Fundu Petróleu ne’e boot tebes”, nia salienta.
BCTL durante ne’e nu’udar jestór operasionál Fundu Petrolíferu, tanba ne’e Xefe Estadu agradese ba Banku Sentrál tanba asume responsabilidade atu jere Fundu Soberanu ne’e.
RSE maka valór másimu ne’ebé bele foti hosi Fundu Petrolíferu iha tinan fiskál ida no husik rekursu sufisiente iha Fundu Minarai ho valór real ekivalente ne’ebé bele foti iha tinan hirak tuir mai .
RSE define hanesan %3 hosi rikusoin minarai, kompostu hosi balansu Fundu Petrolíferu no Valór Prezente Líkidu ba futura reseita minarai.
Jornalista : Cipriano Colo
Editór: Xisto Freitas
