Espoza Prezidente Repúblika, Cidália Lopez Nobre Mouzinho Guterres, asiste diretamente Treinamentu Feto Negosiante Ki'ik iha eis edifísiu KONI Munisípiu Liquiçá. Imajen TATOLI/Cipriano Colo

LIQUIÇÁ, 14 novembru 2019 (TATOLI)–Gabinete Apoiu Atividade Cônjuge Prezidente Repúblika (GAAC-PR) fó apoiu $1.180 ba Treinamentu Feto Negosiante Ki’ik iha Munisípiu Liquiçá, durante loron ida, 14 novembru 2019.
Espoza Prezidente Repúblika, Cidália Lopez Nobre Mouzinho Guterres, ne’ebé asiste direta treinamentu ne’e hateten treinamentu ne’e hola parte iha programa GAAC-PR nian, ho objetivu atu fahe informasaun ba inan-feto sira, atu eleva tan koñesimentu oinsá prepara ai-han ne’ebé di’ak, liuliu hatene hili hahán nutritivu husi ai-han lokál sira.

Cidália fó hanoin katak atividade ne’e hala’o daruak ona. Dahuluk, hala’o iha Ataúro, ne’ebé foku liubá inan sira ne’ebé fila-liman.

Nia hatutan, ohin iha Munisípiu Liquiçá mós realiza treinamentu kona-ba oinsá prepara hahán ne’ebé di’ak, GAAC-PR mak fasilita treinadora sira, oinsá fahe informasaun di’ak liután ba partisipante sira hotu.

“Programa ne’e sei kontinua implementa mós iha munisípiu sira seluk hanesan Manatuto no fatin hotu ne’ebé grupu feto sira eziste. GAAC-PR fó apoiu orsamentu $1.180, iha mós koñesimentu husi Administrasaun Munisipál Liquiçá nian, inklui organizasaun feto sira”, nia esplika.

Inan nasaun ne’e fiar katak husi programa ne’e sei kontribui hadi’a nutrisaun iha Timor-Leste tanba rai ne’e iha ai-han lokál barak ne’ebé iha nutrisaun di’ak, maibé tanba menus de’it iha koñesimentu inan sira-nian bainhira hili hodi prepara ai-han ba oan sira no iha uma.

“Presiza tebes informasaun barak liubá ita-nia komunidade, tanba ita hatene katak ita Timor ne’e hatene de’it kona-ba oinsá bosu, maibé la hatene kona-ba hahán ne’ebé mak iha nutrisaun”, Cidália hateten.

Espoza Prezidente mós husu ba Governu liuliu ministériu relevante sira atu halo sosializasaun tanba atu hetan isin di’ak la’ós ho osan barak, maibé maski ho hahán simples, importante iha ninia valór nutritivu.

Nune’e mós, Prezidente Asosiasaun Feto Potensiál Munisípiu Liquiçá, Hermínia Sarmento hateten GAAC-PR serbisu hamutuk ho Asosiasaun Feto Potensiál Munisípiu Liquiçá nian, atu organiza grupu negosiante ki’ik sira ne’ebé mai husi postu administrativa tolu mak hanesan Bazartete, Liquiçá Vila no Maubara, liuliu sira ne’ebé hela iha área tasi ibun, ka estrada protokolu nian ne’ebé baibain hala’o ona negósiu ki’ik iha dalan ninin sira.

Hermínia informa mós katak grupu neen mak partisipa kompostu husi postu administrativu Bazartete iha grupu rua, Liquiçá Vila grupu rua no Maubara iha grupu rua.

“Munisípiu Liquiçá ita hatene, hahú kedas husi Tibar to’o Loes, komunidade iha estrada ninin sira fa’an hahán naturál hanesan katupa ho ikan tunu, no ema barak mak sempre han tantu husi rai-laran no mós estranjeiru, nune’e formasaun ida-ne’e importante tebes ba sira atu hatene oinsá bele prepara hahán di’ak, iha sabór, moos no iha nutrisaun”, Hermínia haklaken.

Entretantu, Nélia Andrade hanesan treinadora esklarese tipu te’in hahán di’ak ne’ebé oferese iha treinamentu ne’e iha neen mak hanesan boek tunu no ikan tunu ho nia kompozisaun ‘bumbu’ hanesan de’it mai husi sutate naturál uza masin midar ho masin moruk no tunu durante minutu sanulu.

“Tipu tei’n ida seluk, maka halo ‘es buah’ ho budu tasi, primeiru eskalda uluk ho masin midar, hafoin kahur ho kualkér aifuan ne’ebé fásil bele hetan iha rai-laran. Ida tan maka sopa abóbora, ne’ebé halo husi lakeru fuan, de’ut tiha ho lis asu. Ida tan maka ‘puding manga’, ne’ebé halo hanesan ‘puding’ baibain, maibé aumenta tan mak haas. Ida tan maka ‘puding arroz’ ne’ebé uza fós kahur ho susubeen”, nia esplika.

Iha parte seluk, partisipante Zélia dos Santos Vasconselhos espresa ninia sentimentu kontente no profunda agradesimentu tanba bele hetan oportunidade hodi partisipa iha treinamentu ne’ebé oferese husi GAAC-PR oinsá aprende kona-ba te’in hahán ne’ebé di’ak.

“Ha’u aprende kona-ba maneira te’in produtu husi tasi nian, sei aplika iha ha’u-nia negósiu, tanba munisípiu Liquiçá iha poténsia boot ba turizmu, nune’e ba futuru ha’u bele uza koñesimentu ne’ebé ha’u iha, bele dada mós turista mai iha ne’e”, nia tenik.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here