DILI, 14 novembru 2019 (TATOLI)-Zona Fatumaca Desima, ne’ebé kobre Gariuai, Uailili, Buibau ho Samalari, seidauk bele sai Postu Administrativu ida iha Munisípiu Baucau nia laran tanba Governu sei foku hadi’a infraestrutura báziku ba povu hotu.
Notísia Relevante : Xefe Suku Samalari Rekomenda Atu Zona Fatumaca Sai Postu Administrativu
Autoridade Suku sira hosi Zona Fatumaka, hanoin ona no husu ba Governu Sentrál atu bele transforma Fatumaca Desima sai postu administrativu tanba Fatumaca Desima nia potensiál sira prienxe hela rekizitu atu sai postu administrativu ida, maibé Prezidente Autoridade Munisípiu Baucau, António Guterres, hatete, nia parte seidauk iha hanoin no planu atu implementa rekomendasaun xefe suku sira iha area Fatumaca Desima nian.
“Ita seidauk hanoin to’o iha ne’ebá katak Fatumaca Desima atu sai postu ida tanba agora daudaun sei hamutuk hela problema barak mak ita enfrenta hanesan bee moos, eletrisidade, estrada, problema sosiál no ekonómiku ho kultura. Governu presiza konsentra atu hadi’a uluk situasaun moris povu ida ne’e nian,” hateten António Guterres, ohin, hodi responde Ajénsia TATOLI via telefone.
Rekizitu prinsipál atu sai postu administrativu ida mak totál uma-kain tenke rihun-10 ba leten, iha rikusoin natoon, rai ninia luan no rendimentu sufisiente. Hirak ne’e hotu, Fatumaca Desima prienxe hela maibé agora la’ós oportunidade.
“Agora ita seidauk hatene katak aban ka bainrua sai postu ida tanba ita sei iha faze ba preparasaun desentralizasaun administrativa bainhira tama ona ba desentralizasaun territoriál no órgaun deliberativu iha ona, mak halo estudu viabilidade ida kona-ba kestaun fundamentais sira ne’e,” esplika António Guterres.
Jornalista : Osória Marques
Editór : Francisco Simões
