Country Assurance Leader Empreza Ernst Young Audit Associados, Rui Martins. Foto/Natalino Costa.

DILI,14 novembru 2019 (TATOLI) – Country Assurance Leader Empreza Ernst Young Audit Associados (EY), Rui Martins, kompromete hodi kontinua apoia Timor-Leste iha kestaun auditoria.

“Ami-nia kompañia durante ne’e serbisu hamutuk ho Governu Timor-Leste haree liu ba kestaun auditoria, oinsá fó hanoin ba Governu atu halo auditoria ho di’ak liu ba institusaun Governu nian ne’ebé eziste hodi bele garante transparénsia iha prosesu akuntabilidade nian”, Rui Martins ba jornalista sira hafoin remata semináriu iha Timor Plaza, ohin.

Nia akresenta EY kontinua nia kompromisu atu sai parseiru ho Governu hodi halo prosesu auditoria iha institusaun Estadu, tanba ne’e, liuhosi semináriu importante ne’e hodi partilla serbisu EY nian ba Ezekutivu liuliu ba setór públiku no privadu.

“Ami partilla serbisu EY nian ba setór públiku no privadu ne’ebé partisipa iha ne’e, kona-ba área auditoria liuliu atu hametin transparénsia no akuntabilidade iha institusaun Governu“, akresenta tan.

Empreza EY durante tinan lima ona eziste iha Timor-Leste. Kompañia ne’e husi Portugal atu apoia rai ne’e hodi garante transparénsia no akuntabilidade.

Iha fatin hanesan, Asesór Ministériu Petróleu no Minerál, Octavio Jordão, hateten hanesan setór públiku, na’in ba osan maka povu, Governu liuhosi instituisaun relevante sira maka jere, entaun tenke iha obrigasaun atu halo relatóriu no aprezenta auditadu, atu iha transparénsia tuir padraun no regulamentu EY nian.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here