Asesór Programa Peska NIFA (MAP), Lee, Jung-Uie, Imajen/Tatoli Egas Cristovao.

MAUBARA, 14 novembru 2019 (TATOLI) — Institutu Nasionál Peska no Akikultura (NIFA, sigla inglés) Ministériu Agrikultura no Peska (MAP) iha atividade prinsipál tolu kona-ba akikultura no peska iha suku Vatuvou, Postu Administrativu Bazartete, Munisípiu Liquiçá.

Institutu peska nasionál ne’e estabelese iha fevereiru 2018, ne’ebé suporta husi Korea International Cooperation Agency (KOICA).

NIFA iha rekursu umanu hodi dezenvolve no treinu tekonolojia akikultura ba indústria akikultura iha futuru.

Asesór Programa Peska NIFA, Lee, Jung-Uie, informa funsaun tolu ne’e mak halo peskiza no dezenvolvimentu. Dezenvolve teknolojia hakiak ikan ba futuru indústria akikultura mak pellet ikan ho ingrediente agrikultura lokál, sistema resirkulasaun akikultura, hakiak seletivu no ibridisaun no dezenvolvimentu hakiak espésie ba futuru.

Produsaun fini mak distribuisaun no husik fini ikan. Distribuisaun fini tilapia mono-sexu ba akikultór sira, husik espésie orijen ba sistema akuatiku naturál, no extensaun sebisu ba teknolojia hakiak ikan.

Funsaun ikus mak treinamentu no edukasaun. Kapasita iha teoria no prátika laboratóriu ka kampu ba hakiak ikan mak ofisiál Governu sentrál no lokál iha peska, akikultór no lider kooperativa sira, joven sira ne’ebé atu bá serbisu iha fatin hakiak ikan iha Korea no estudante departamentu peska iha universidade no koléjiu.

“Tanba ne’e ita hahú treinu akikultór no afisiál Governu tanba ha’u hakarak sira dezenvolve iha teknolojia. Iha tinan kotuk, joven timoroan 105 ne’ebé bá Korea serbisu iha peska liuhusi SEFOPE no tinan ne’e ami só treinu de’it ofisiál Governu hamutuk 28”, Jung-Uie relata ba Ajénsia Tatoli, ohin.

Timor-Leste iha liña kosteira kilómetru 700 signifika iha poténsia ne’ebé di’ak tebes ba indústria peska no akikultura.

Jung esplika, Governu hetan apoia hosi KOICA hodi hasa’e liután kapasidade hodi maximiza potensialidade ida ne’e no ba dezenvolvimentu sustentabilidade akikultura indikadu ba problema mukit iha nasaun liuhosi estabelese Institutu Nasionál Peska no Akikultura Timor-Leste (INPA-TL).

NIFA nia misaun mak dezenvolve baze indústria akikultura liuhosi dezenvolvimentu teknolojia no kapasitasaun.

Vizaun mak nu’udar ajénsia jerál ba dezenvolvimentu rekursu umanu no extensaun servisu iha Tmor-Leste, haboot negósiu akikultura hodi aumenta vantajen indústria nian, fornese valór proteína no nutrisaun ne’ebé aas.

NIFA iha estratéjia mak hanesan produsaun fini, peskija no dezenvolvimentu, kapasitasaun, governasaun no polítika, akikultura no fornesesdór ikan proteína.

Institutu ne’e mós iha fasilidade ba aula peskiza mak hanesan laboratóriu, aula formadór, aula hanorin no aula semináriu kona-ba ikan nian.

Nune’e mós viveiru mak hanesan aula formulasaun pellet, armazein hahán no aula preparasaun, tanke haboot mak hanesan tanke hakiak ikan, tanke filtrasaun bee halai liuhosi Sistema Resirkulasaun Akikultura (SRA).

Silveiro Pereira Mendes hanesan Tékniku NIFA, akresenta fatin ne’e hanesan fini ba ikan oin tolu hanesan tilapia/nila, lele no ikan mas.

“Kuandu ikan ne’e boot oituan tenke muda fali ba tanke boot no ikus liu pasa fali ba tanke konkretu ne’e, hanesan halo rotasaun”, katak nia.

Notísia relevante : NIFA Prontu Fornese Ikan-oan ba Komunidade

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here