Kontra-atake entre jogadór AS Marca no jogadór FC Kuda Ulun iha Kampu FFTL, ohin. Imajen Mídia LFA

DILI, 14 novembru 2019 (TATOLI)–AS Marca halakon armada FC Kuda Ulun ho golu 2-1 iha jogu kontinuasaun Terseira Divizaun Liga Futeból Amadora (LFA) époka 2019 ne’ebé hala’o iha kampu Federasaun Futeból Timor-Leste (FFTL), Bairru Formosa, Dili, kinta ne’e.

Golu vitória Marca nian atribui hosi jogadór Anis Tliman iha minutu 16, Fredelino Fernandes 86. Enkuantu, golu úniku hosi Kuda Ulun hatama hosi Marcos de Jesus iha minutu 22.

Treinadór Kuda Ulun, Castelo Branco, rekoñese katak sira lakon tanba ladún kontrola bola ho di’ak.

“Ami lakon tanba ha’u-nia jogadór sira ladún kontrola bola ho di’ak. Maibé, iha jogu rua tuir mai, ami sei hadi’a para manán,” tenik treinadór ne’e.

Iha sorin seluk, treinadór AS Marca, Romão Guterres hateten Marca sempre hatudu jogu bonitu tanba iha ona alvu sa’e ba Segunda Divizaun iha tinan oin.

“Ba jogu saida de’it ami konsidera hanesan jogu finál, tan ne’e ami esforsu aan para tenke manán,” Romão dehan.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here