Prezidente Autoridades Nasional Comunicação ( ANC) João Olivio Freitas. Imajen/Tatoli.

DILI, 14 novembru 2019 (TATOLI) – Prezidente Autoridade Nasionál Komunikasaun (ANC, sigla portugés), João Olívio Freitas, ba Ajénsia Tatoli iha nia knaar fatin, Kaikoli, ohin, informa ANC hahú prepara ona regulamentu reklamasaun hasoru operadór telekomunikasaun sira bainhira operadór sira halo buat laloos hasoru kliente ba uzu telekomunikasaun nian.

Regulamentu ne’e iha oin rua, maka consumer complaints no consumer disputes guidelines, entaun objetivu husi regulamentu ne’e atu fó hanoin ba operadór tolu hanesan Timor Telecom, Telkomsel no Telemor atu respeita konsumidór ka kliente sira-nia direitu uza operadór telekomunikasaun.

Nia esplika regulamentu consumer complaints nu’udar regulamentu reklamasaun husi kliente ba operdór sira, bainhira halo buat balun la kona laran kliente sira, entaun regulqmentu ne’e maka sei regula, nune’e mós consumer disputes guidelines nu’udar regulamentu ANC ne’ebé hasai ba operadór sira, kuandu kliente sira enfrenta problema ba telekomunikasaun maka reklama ba parte operadór, iha prazu loron tolu nia laran la rezolve, entaun hanaran disputa.

Nune’e, disputa ida ne’e, ANC maka iha kompenténsia atu rezolve tanba ne’e disputa entre kliente ho operadór ne’ebé la konsege iha solusaun, ne’e maka bolu consumer disputes guidelines.

Regulamentu ne’e iha ona esbosu husi ANC no sei elabora bainhira iha ona redasaun finál no entra ein vigór, ANC husu operadór sira tenke kumpre regulamentu ida ne’e, nune’e bele respeita kliente sira hosi operadór tolu.

Antes ne’e, ANC halo ona konsulta públika dezde 16 setembru to’o 30 outubru, konsulta ne’e ba operadór tolu, hodi husu sira-nia opiniaun ba regulamentu ne’e.

“Ami halo ona konsulta ba Timor Telecom, Telkomsel no Telemor, hosi regulamentu rua, sira dehan laiha problema no prontu kumpre”, salienta.

Tuir nia katak regulamentu ne’e maka empreza telekomunikasaun la kumpre, entaun ANC sei fó sansaun, ezempu, kuandu operadór sira la halo tuir regulamentu rua ne’e hodi tau iha prátika loroloron maka ANC sei fó sansaun administrativa no suspende atividade operadór nian.

“Sempre mosu preokupasaun husi kliente ba operadór tolu, kona-ba uza telekomunikasaun, hanesan dala barak ema posting iha facebook katak fó sala ba empreza tolu. Tanba saida ha’u hola pulsa maibé seidauk ko’alia no uza pulsa dalaruma hotu, tanba ne’e maka ANC kria regulamentu rua ne’e atu nune’e operadór sira kumpre, nune’e respeita direitu ba kliente sira”, subliña.

Jornalista : Natalino Costa 
Editora : Maria Auxiliadora

HAKEREK NO HATÁN

Please enter your comment!
Please enter your name here