Sekretáriu Estadu Arte no Kultura, Teófilo Caldas. Imajen/Tatoli Egas Cristovao

DILI, 14 novembru 2019 (TATOLI)-Sekretáriu Estadu Arte no Kultura (SEAK), Teófilo Caldas hateten, iha istória tanba iha akontesimentu ruma, akontesimentu ne’ebé akontese iha pasadu, sai istória mai iha prezente no ba futuru.

“Ita hakarak Komisaun Nasionál Chega hamutuk ho peritu sira bele partilla informasaun ne’ebé sobre istória loziká no istória ne’ebé los no iha kualidade,” hateten SEAK, Teófilo Caldas bainhira halo abertura iha Palestra Públiku iha ámbitu Justisa tranzisionál, Istória no Arkivu, iha Salaun konferensia Sentru Chega iha Antigu Komarka Balide, ohin.

Tuir Governante ne´e katak Timor-Leste mai ho prosesu naruk. “Sira ne’ebé idade sira ho ami (Teófilo Caldas) hanesan sira asiste rasik no estudante sira ne’ebé moris iha noventa ba leten la akompaña akontesimentu sira ne’e, ohin ita-boot (estudante ) sira, rona istória kona-ba saida mak akontese iha pasadu”.

“Hanoin ukun aan ne’e, derepente iha kontente, rona múzika, dansa, ida ne’e mak ukun aan, maibé ne’e la’ós. Ukun aan mai husi sofrimentu naruk ida, mai husi dedikasaun ema barak nia testamuña moris ba luta sira ne’e. Ha’u husu partisipante sira atu rona didi’ak saida mak istória,” katak Teófilo Caldas.

SEAK informa, Programa Oitavu Konstitusiónal liuhusi SEAK atu serbisu hamutuk ho Komisaun Nasionál Chega no AMRT ( Arkivu no Muzeu Rezisténsia Timor-Leste) atu haree ita-nia istória sira prezerva konserva, istória sira atu patrimónia kulturál, patrimóniu istóriku sira, para oinsa bele halo prezervasaun hodi bele fornese ba jerasaun foun sira hodi bele haree iha tempu futuru.

“Ko’alia istória ko’alia mós autor sira. Kuandu ita ko’alia istória ita ko’alia mós peritu sira atu hakerek netik livru ruma (istória) para bele husik hela mai ita. Istória la hakerek ba livru, istória ne’e lakon. Istória hakerek iha livru, tinan ba tinan too rai ne’e lakon, istória ne’e iha nafatin. Ne’e ita dehan prezervasaun, konservasaun patrimóniu istóriku.

Nia akrsenta, Oitavu Governu kompromete hakarak konzerva, prezerva patrimóniu istóriku sira sai hanesan patrimóniu estadu. Sente kontente kuandu partisipante maioria jovens, tanba palestra ida ne’e, atu partilha lori ita ba rona informasaun sobre istória. “Iha eventu ida ne’e, hakarak estudante sira tenke rona, intende no hatene istória”.

“Tempu tuir sei serbisu hamutuk ho Komisaun Nasionál Chega ho AMRT para prodús istória ne’ebé kualidade, signifika istória ne’e la aumenta, la inventa la halo menus, para ita husik hela istória ida ne’ebé dignu ba ita-nia jerasaun foun sira,” garante SEAK.

Jornalista : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here