DILI, 13 novembru 2019 (TATOLI)–Durante enkontru ho Prezidente Repúblika, Francisco Guterres Lú Olo, estrutura husi Câmara Comércio Indústria de Timor-Leste (CCI-TL), aprezenta preokupasaun bazeia ba observasaun katak tinan tolu ona ekonomia rai-laran la’o ladún di’ak.

“Ita preokupa tebes ho situasaun ekonomia rai-laran. Tinan tolu ona mak Timor-Leste nia ekonomia la’o ladún di’ak. Ita mós aprezenta kestaun ne’e ba Prezidente Repúblika”, Prezidente CCI-TL, Oscar Lima esplika ba mídia hafoin enkontru, iha Palásiu Prezidente Nicolau Lobato, Bairru Pité, Dili, ohin.

Nia esplika katak situasaun ne’e kontribui hasa’e númeru dezempregu, empreza ki’ik barak mak taka, kreximentu ekonómiku dinámiku maibé ladún di’ak tanba iha tinan 2019 tun ba %1.9.

Emprezáriu ne’e preokupa liután tanba ho ida-ne’e Timor-Leste tama daudaun ona ba resesaun ekonómiku.

“Bainhira dezenvolvimentu ekonomia kontinua la’o hanesan ne’e nafatin to’o tinan-tolu, Timor-Leste sei hasoru depresiasaun ekonomia”, Oscar haklaken.

Kona-ba preokupasaun ne’e, nia informa, Prezidente Repúblika enkoraja CCI-TL hanesan ajente dezenvolvimentu nu’udar parseiru Governu, atu kontribui hadi’ak no muda kultura sosiedade husi kultura konsumu ba produsaun.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here