Imajen hosi pájina FB Tiger Beer Timor-Leste

DILI, 13 novembru 2019 (TATOLI) – Kompañia Heineken liuhosi serveja Tiger sei realiza eventu finál ba hahán iha dalan-ninin (Tiger street food) liuliu sate, atu hetan vensedór hosi kompetisaun “Chef sate di’ak liu iha Timor-Leste, 2019”.

Atividade ne’e ho hanoin mak prezerva kultura hahán dalan-ninin no valoriza tein-nain sira, katak nota komunikadu ne’ebé Tatoli simu, ohin.

Serveja Tiger sei realiza eventu finál iha sesta semana ne’e (15/11/2019), fatin supermerkadu Pateo nia estasionamentu. Ema hotu bele tama ho gratuita, no sei hahú tuku 17.00 loraik.

Eventu ne’e, serveja Tiger mak suporta kustu hotu, tanba hakarak fó oportunidade ba ema atu faan sira-nian produtu ho kondisaun ijiene no garante katak vendedór sira hotu hetan rendimentu di’ak atu suporta sira-nian negosiu.

“Iha dalan-ninin hotu, ita sempre hetan ema faan sate, hanesan parte ida hosi kultura Timoroan nian”, katak Ana Guterres nu’udar Jerente Ativasaun Marka Heineken Timor-Leste liuhosi nota komunikadu ne’e.

Atividade ne’e servisu hamutuk ho asosiasaun otél no mós asosiasaun arte. Serveja Tiger hahú movimentu ne’e iha Singapura, Malázia, Myanmar no Japaun atu selebra diversidade ho hahán dalan ibun.

Manan nain hosi atividade ne’e sei hetan osan ho valór $3.000 ho hanoin atu hadia sira-nian kondisaun negósia.

Eventu finál sei aprezenta mós múzika, expozisaun arte hosi ema ida-idak nian kreatividade, no mós hahán dalan-ninin sira seluk ne’ebé sei prepara durante serimonia. Atividade ne’e hahú ona iha fulan-maiu no hala’o ona dala tolu iha Dili.

Henrique Afonso nu’udar pirata ne’ebé halo nia viajen haleu mundu ho ró Sofia do Mar, sei fahe ninia esperénsia iha supermerkadu Pateo, iha loron aban, tuku 18.00. Afonso hakarak repete tradisaun iha tinan 300 nia laran ho “vinho da torna”. (ki)

HAKEREK NO HATÁN

Please enter your comment!
Please enter your name here