Sekretáriu Administrasaun Munisipál Liquiçá, Renato Nunes Serrão. Imajen/Tatoli Egas Cristovao

LIQUIÇÁ, 13 novembru (TATOLI) — Sekretáriu Administrasaun Munisipál Liquiçá, Renato Nunes Serrão, hateten bainhira podér sentraliza de’it iha nasionál entaun susar ba Governu atu fó resposta ba povu nia moris.

Tuir Monografia 2018 nian, Munisípiu Liquiçá iha Postu Administrativu tolu, hanesan Liquiçá Vila, Bazartete no Maubara ho suku 23, aldeia 134 ho ninia luan 550,950, totál família iha 15,820, mane 38,431, feto 39,000. Totál populasaun hamutuk 77,431.

Postu Administrativu Liquiçá Vila iha suku hitu (7) mak hanesan Dato, Loidahar, Hatuquessi, Darulete, Leotela, Aço-Manu no Lukulai. Postu refere iha aldeia 39, família 5,019, mane 11,910, feto 12,230. Totál hamutuk 24,140, postu ne’e nia luan 98,58km2.

Pur tantu Postu Administrativu Bazartete iha suku sia (9) hanesan Tibar, Ulmera, Mota Ulun, Lauhata, Maumeta, Metagou, Fahi Lebo, Leorema no Fatumasse. Postu ne’e iha aldeia 45, família 5,971, mane 15,156, feto 15,260 no totál hamutuk 30,416, postu ne’e nia luan área 187,53km2.

Postu Administrativu Maubara iha suku hitu (7) hanesan Vatuvou, Vatuboro, Guicho, Gugeleur, Maubara Lisa, Lissadila no Vaviquinia. Postu Maubara iha aldeia 50 no família na’in 4,830, mane 11,365, feto 11,510 no totál hamutuk 22,875, postu ne’e ninia luan área 264,84km2.

Sekretáriu Administrasaun Munisipál esplika, populasaun sira iha parte foho maioria moris ho agrikultura, balun hela sidade moris ho peska, maibé problema boot ne’ebé Governu lokál enfrenta mak oinsá atu fó resposta ba povu nia moris bainhira presiza.

Nia haktuir, ba tinan ne’e orsamentu ba munisípiu Liquiçá hamutuk $2,592,967.00 ba kategoria tolu de’it hanesan saláriu no vensimentu, bens no servisu no transferénsia públika, laiha kapitál menór no kapitál dezenvolvimentu, kategoria tranferénsia públika ne’e selu ba xefe suku sira-nia saláriu no ba Planu Dezenvenvolvimentu Suku (PNDS) nian.

“Se buat hotu ne’e iha Governu sentrál hela, dalaruma ita ko’alia kona-ba dezevolvimentu mas ita seidauk fó resposta pozitivu ba povu nia moris”, Sekretáriu Administrasaun Munisipál Liquiçá informa ba Ajénsia Tatoli iha Liquicá, ohin.

Nia haktuir, dalaruma tun-bá baze komunidade ezije bee-moos, tanba problema bee-moos ne’e akontese duni, maibé administrasaun munisípiu nia kompeténsia iha limitasaun.

Temi povu moris di’ak ne’e tenke aspetu infraestrutura tolu hanesan bee-moos, estrada no eletrisidade, ne’e hakarak ka lakohi Governu tenke fó atensaun, atu fó resposta munisípiu tenke iha osan rasik.

Nia haktuir, durante implementasaun projetu bee-moos iha área rurál ne’e hosi ajénsia internasionál sira.

“Problema bee-moos ne’e ita seidauk fó resposta tanba kuandu ita halo tiha planu bee-moos ba suku ida ho família 50 mas dalaruma tinan-rua mai ne’e kreximentu populasaun aumenta ona. Ita ko’alia kona-ba kestaun sosiál dalaruma komunidade sira seidauk kontribui tanba tesi no sunu rai arbiru, entaun ne’e fó impaktu ba bee”, katak.

Nune’e mós ko’alia kona-ba problema natureza dalaruma anin no udan mós estraga fasilidade bee-moos, ko’alia kona-ba komunidade nia konxiénsia dalaruma sira sobu kanu.

Atu fó solusaun ba situasaun ne’e, Administrasaun Munisipál kria programa tara-bandu nune’e komunidade sira labele tesi no sunu rai arbiru.

“Ami simu hosi SAS munisipál nian, ita-nia atinjementu asesu bee-moos ba komunidade 68%, signifika 32% seidauk asesu ba bee-moos”, dehan nia.

Nia fó sai katak, kondisaun estrada iha suku 23 iha munisípiu Liquiçá la grave liu, maibé Governu tenke fó resposta tuir povu nia hakarak.

“Estrada ne’e fatór ida importante no iha ligasaun barak, agora estrada parte Bazartete nian hahú konstrui ona”, Renato dehan.

Produtu lokál favoritu Munisípiu Liquiçá mak kafé, nú, hudi, ai-farina no sei iha produtu seluk tán, mas seidauk dezenvolve didi’ak setór produtivu sira, maibé atribuisaun kompeténsia ne’e mak oras ne’e kontinua sentraliza iha nasionál, entaun susar atu fó resposta ba povu nia moris.

“Ne’e probema ida ba autoridade ami oinsá mobiliza, sensibiliza komunidade tenke fó atensaun ba to’os, subsídiu Governu bele fó mas ita-nia moris hosi agrikultura ne’e ita tenke kaer nafatin to’os”.

Postu Administrativu tolu ne’e iha poténsia ba setór agrikultura hotu, liuliu kafé. Suku sira ne’ebé poténsia kafé mak hanesan Leorema, Darulete, Aço-Mano, Leotela, Hatuquessi, Fatumasse, Metagou, Dato, Fahilebo, Vatuvou no seluk tán.

Progresu ne’ebé Governu atinje mak eletrisidade tanba populasaun suku 23 iha Liquiçá 80% asesu ona eletrisidade, hela de’it suku Aço-Mano no Leotala mak seidauk hetan eletrisidade.

“Hosi Área la Soe Fo’er Arbiru (ALFA) iha maiu ne’e ita deklara ona ALFA nível munisipál, ita mobiliza komunidade tenke iha sintina rasik, tanba ita soe fo’er arbiru ne’e mak dalaruma kontribui ba moras”, katak.

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here