DILI, 13 novembru 2019 (TATOLI) – Oxfam iha Timor-Leste (TL) lansa nia submisaun ba Parlamentu Nasionál (PN) kona-ba proposta Orsamentu Jerál Estadu (OJE) 2020. Oxfam apresia katak kompromisu Governu kona-ba inkluzaun no ema ho defisiénsia iha rai ne’e aas.

Iha submisaun ida ne’e, Oxfam apresia Governu hasa’e ona alokasaun orsamentu ba agrikultura, no husu Governu tenke iha estudu independente ida hodi halo avaliasaun ba atuál sistema rejistrasaun rai hosi Sistema Nacional de Cadastro (SNC).

Komunikadu ne’ebé Ajénsia Tatoli asesu, ohin, katak agrikultura, inkluzaun, ema ho defisiénsia no direitu ba rai nu’udar preokupasaun xave hosi Oxfam nia submmisaun ba parlamentu.

Tanba ne’e, Oxfam hakarak hato’o parabéns ba Governu Konstitusionál Daualuk ne’ebé  aumenta ona orsamentu husi millaun $14.9 iha 2019 ba millaun $21.5 iha 2020 ba Ministériu Agrikultura nian, nune’e, Oxfam husu Governu atu asegura katak aumenta orsamentu ba agrikultura, sei fó benefísiu direta ba komunidade agrikultór feto no mane ne’ebé mak vulneravel no ki’ak liu.

Iha orsamentu 2020 inklui mós proposta millaun $10 husi Ministériu Obra Públika ba reabilitasaun estrada rurál hamutuk 25l, maske nune’e, seidauk klaru katak estrada ida ne’ebé mak sei tama ba prioridade no estrada hirak ne’ebé mak sei fó impaktu ba komunidade agrikultór iha rurál, partikularmente ba sira ne’ebé  laiha asesu ba merkadu lokál.

Enkuantu, Oxfam hakarak fó parabéns ba Governu TL, relasiona ho aprovasaun unanimidade ba Rezolusaun n.º/V (2.ª) kona-ba promosaun no protesaun ba ema ho defisiénsia. Tanba ne’e, Oxfam husu ba Governu atu adopta mekanizmu alokasaun orsamentu ne’ebé apropriadu ba 2020-2021 ba ema ho defisiénsia no garante dezenvolvimentu inkluzivu iha TL.

Konklui katak direitu ba rai Governu nia kontratu ho GMN-H no ARM-Apprize sei termina iha dezembru 2019. Oxfam husu ba Governu atu hahú halo avaliasaun lalais no independentemente kona-ba SNC antes dezembru 2019, liuliu foka ba prosesu resjistrasaun, konflitu potensiál relasaun ho rai iha TL, impaktu ba ema vulneravel, no sustentabilidade no transparánsia husi SNC.

Jornalista : Zezito Silva
Editora : Maria Auxiliadora

HAKEREK NO HATÁN

Please enter your comment!
Please enter your name here