Hapara Violensia Hasoru Feto. Imajen/Foti hosi Google

DILI, 13 novembru 2019 (TATOLI) -Atoy, la’ós nia naran loloos, tenke ba ‘toba’ iha otél prodeo (prizaun Becora) durante tinan tinan ida atu bele halo reflesaun no hakribi ninia hahalok  krime koasaun seksuál hasoru lezada Rosália, la’ós nia naran loloos.

Liuhosi audiénsia julgamentu, ohin, iha Tribunal Distritál Dili (TDD), Juiza titular  Edite Palmira, hamonu sentensa tinan tolu prizaun no suspende ba tinan rua, ba arguido Atoy tanba Juiza titular konsidera akuzasaun hosi Ministériu Públiku hasoru Atoy provadu hotu no Atoy rasik rekoñese nia halo duni koasaun seksuál hasoru Rosália tanba ho kondisaun lanu todan.

Juiza titular husu ba Atoy atu hakribit kedas sala ne’ebé mak nia komete. Tanba se iha futuru mak Atoy komete fali kazu hanesan maka Tribunal sei hamonu sentensa pena prizaun tinan tolu efetivu.

Tuir kronolojia, iha loron 20 Outubru 2018, tuku 14:00 iha Taibessi, merkadu laran, lezada Rosália toba hela iha nia baraka fa’an modo okos.

Baraka ne’e falun de’it ho saku (karon) aat. Iha momentu neebá Atoy mai ho kondisaun lanu todan, toba tan lezada no lolo liman lamas iha lezada nia zona sensitivu (area terlarang).

Atoy mós ho avontade buti no lamas halimar  Rosália nia isin ho maka’as hodi halo Rosália hakfodak no hakilar maka’as tanba ta’uk.

Atoy nia hahalok ne’e lori trauma boot ba Rosália no ho nervozu halo kedas keixa ba Polisia hodi halo detensaun ba Atoy no kontinua submete ba Ministériu Públiku.

Atoy nia aktu ne’e kategoria komete krime koasaun seksuál ne’ebé previstu iha artigu 171 hosi kódigu penal Timor-Leste nian.

Audiénsia julgamentu ba Atoy ho Rosália nia kazu ne’e  prezide hosi Juiza titular  Edite Palmira, Ministériu Públiku reprezenta hosi Prokuradór Pedro Batista, no Atoy hanesan arguido hetan asisténsia legal hosi advogadu privadu, Miguel Faria ho Emilio Pereira de Jesus Sarmento.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here