Diretór Jerál SEFOPE, Paulo Alves. Imajen/Egas Cristovão

DILI, 13 novembru 2019 (TATOLI) – Empreza MADEC hosi Austrália, ohin, halo teste tan ba joven timoroan hamutuk atus hitu (700) antes bá serbisu iha país viziñu ne’e.

Diretór Jerál Sekretáriu Estadu Formasaun Profisionál no Empregu (SEFOPE), Paulo Alves, hateten kompañia MADEC hosi Austrália durante loron rua fó teste ba timoroan sira atu bá serbisu iha nasaun refere.

“Ohin, ajénsia rekrutadór ba traballadór hosi Austrália mai halo teste ba kandidatu timoroan sira para bá serbisu. Kandidatu hamutuk 700 maibé sei foti de’it 400 hodi bá serbisu”, hateten Diretór Jerál, Paulo Alves ba Tatoli liuhosi telefone, ohin.

Paulo Alves haktuir teste ne’e diretamente halo hosi ajénsia sira ne’ebé rekruta serbisu-na’in timoroan sira iha kuarta no kinta ne’e (13-14/11).

“Teste ne’ebé ajénsia halo maka teste fíziku no teste ba sira ne’ebé sei serbisu lori karreta. Fó sai rezultadu depende ba sira (ajénsia rekrutadór) tanba sira maka entrevista direta ne’ebé rezultadu sira sei haruka fali mai ita (SEFOPE)”, haktuir Paulo Alves.

Nia afirma objetivu hosi teste ne’e maka joven hirak ne’ebé naran iha tiha ona sistema baze de dadus no sira ne’ebé ezame tiha ona, iha ona profile depois to’os-na’in sira hosi Austrália husu SEFOPE submete naran ne’e ba sira no sei hili fali.

“No haruka mai katak ema sira ne’ebé atu tuir teste ba fíziku maka naran ne’ebé sira haruka mai no ami kontaktu ema sira ne’e, no liu bele bá serbisu iha Austrália, laliu hein fali oportunidade seluk”, esplika Paulo Alves.

Foin-sa’e hamutuk 700 ne’ebé maka tuir teste, daudaun sira liu ona ezame inglés no naran tama ona iha sistema de dadus. Hosi 700 ne’e rekruta iha 2012 to’o mai 2019.

“Programa ne’e hala’o tanba kooperasaun Governu Timor-Leste ho Austrália no programa ne’e kada fulan neen”.

Entretantu, timoroan ne’ebé bá serbisu iha nasaun viziña ne’e hamutuk rihun 3-resin no iha 2019 (janeiru-novembru) hamutuk 1.219.

Jornalista : Antónia Gusmão
Editora : Maria Auxiliadora

1 KOMENTÁRIU

  1. temi jovem 700 nee tau ho foto, labele tau mak Director nia oin. Ema hakarak hare foto real jovem barak nebe ba tuir processsu nee para ema fiar.

HAKEREK NO HATÁN

Please enter your comment!
Please enter your name here