Sekretáriu Estadu Komunikasaun Sosiál, Merício Juvinal dos Reis Akara.

DILI, 13 novembru 2019 (TATOLI) – Governu liuhosi Sekretáriu Estadu Komunikasaun Sosiál (SEKOMS), Merício Juvenal dos Reis Akara, husu ba públiku atu akompaña diskusaun Orsamentu Jerál Estadu (OJE) 2020 ne’ebé sei akontese semana oin iha Parlamentu Nasionál.

“Públiku persiza informadu, ita la halo kompetisaun entre Governu ho Parlamentu Nasionál, ita idak-idak kumpre obrigasaun tuir kompeténsia ne’ebé iha”, dehan Merício Akara liuhosi nota komunikadu ne’ebé Tatoli simu, ohin.

Nia afirma: “Governu kumpre ona nia obrigasaun nu’udar ezekutivu, elabora orsamentu tuir nesesidade programa no prioridade nasionál governu nian no entrega ona ba parlamentu nasionál hodi diskute, halo audiénsia normál iha komisaun sira, depois lori ba plenária hodi rona pozisaun Governu, depois deside vota kontra ka a favor”.

Tuir nia haree audénsia públika ne’ebé akontese iha kada komisaun la’o di’ak, tanba membru governu sira partisipa ho ativu hodi aprezenta rezultadu ezekusaun OJE 2019 no planu prioridade seluk ba tinan oin.

Akara akresenta diskusaun ne’ebé akontese iha komisaun nu’udar prosesu normál, depende ba membru komisaun sira atu hatún ka aumenta.

“Agora depende ba membru komisaun sira, konserteza Governu sei esplika no justifika proposta OJE ho rasionál durante debate ho PN no sei la taka dalan ba mudansa ruma bainhira presiza”, realsa.

Nia afirma hodi konklui prosesu sira ne’ebé akontese iha uma fukun nu’udar ezersísiu demokrátiku, la’ós kompetisaun institusionál entre orgaun soberanu sira. (ki)

Semana Oin, PN Hahu Debate OJE 2020

HAKEREK NO HATÁN

Please enter your comment!
Please enter your name here