Komisáriu KFP, José Telo Soares Cristóvão, entrega dokumentu promosaun rejime jerál karreira ba diretór liña ministeriál sira. Imajen/Eugénio Pereira

DILI, 13 novembru 2019 (TATOLI)-Komisaun Funsaun Públika (CFP-sigla portugés), ohin, anunsia ona rezultadu teste promosaun grau ba rejime karreira iha administrasaun públiku durante 2019.

Notísia Relevante : Lider Parpol Balun Tenta Intervein Servisu KFP

Iha rezultadu teste ne’ebé KFP hala’o fulan hirak liu ba, nia rezultadu hatudu katak   Funsionáriu Públiku hamutuk na’in 1.354 maka pasa iha teste  promosaun  grau.

Notísia Relevante      : FP Porsentu 80 Tuir Ona Teste Promosaun Grau

Promosaun ne’e ,  hala’o bazeia ba dekretu lei númeru 1/2018, loron 14, janeiru, no altera  ba dekretu lei númeru 5/2019, marsu, kona-ba rejime promosaun ba pesoál iha karreira administrasaun públika.

Prezidente Komisaun Funsaun Públika, Faustino Cardoso Gomes, informa,  durante prosesu implementasaun dekretu governu ba promosaun ne’e, KFP hasai orientasaun rua ho deliberasaun lima kona-ba regra no kondisaun iha prosesu promosaun hodi kontempla lakuna sira maka haktuir iha rezolusaun Governu nú.19/2019, maiu.

Hosi totál Funsionáriu Públiku  1.354 ne’ebé maka  promovidu iha promosaun ne’e,  kompostu hosi grau A ema na’in 61, feto 10 no mane 5. Grau B hamutuk ema na’in 180, feto 35 no mane 145, grau C ema na’in 287, feto 93 no mane 193.

Notísia Relevante      : Promosaun Grau Ba Funsionáriu Hein Públikasaun Jornál Repúblika

Enkuantu  hosi  grau D hamutuk ema na’in 416, feto 122 no mane 294, grau E ema 295, feto 66 no mane 193, grau F hamutuk ema na’in 151, feto 31 no mane 120.

Nia dehan, prosesu loke konkursu ne’e hahú iha loron 6 fulan Agostu to’o 19 fulan Setembru 2019  hodi rejista kandidatu hamutuk 10.445. Maibé hosi prosesu verifikasaun ne’e, Komisaun aprova ema na’in 9.350 maka prienxe rekizitu no restu la prienxe tanba komete irregularidade ne’ebé implika ho pena.

Notísia Relevante      : KFP Promove Grau Funsionáriu Públiku Liuhusi Teste Eletróniku

Faustino Cardoso Gomes relata,  Komisaun entrega ona relatóriu teste ne’e ba Diretór Rekursu Umanu kada liña ministeriál, Sekretáriu Estadu no Instituisaun Estadu hodi implementa tanba sei iha mudansa salariál hahú iha loron 1 janeiru 2020, bazeia  ba dekretu lei 24/2016 ne’ebé regula estrutura salariál iha Administrasaun Públika tuir grau no eskalaun.

Ba Funsionáriu Públiku ne’ebé la pasa iha prosesu promosaun ne’e, Prezidente KFP, Faustino Cardoso Gomes, hateten, sei iha tan promosaun grau  iha 2020.

“Ba sira ne’ebé tinan ne’e la konsege promovidu atu tuir nafatin to’o konkista vitória,” nia tenik tan hodi apela ba Funsionáriu sira ne’ebé maka la satisfás ho rezultadu ne’e bele rekursu ba ekipa painél juri KFP nian.

Notísia Relevante      : Gaspar Soares Diskorda ho Matéria Promosaun Hosi KFP

Jornalista : Eugénio Pereira

Editór       : Francisco Simões

6 KOMENTÁRIU

HAKEREK NO HATÁN

Please enter your comment!
Please enter your name here