Diretór ESP Comoro, Pe. Aderito Manuel Victor. Imajen: Tomé Amado

DILI, 13 Novembru 219 (TATOLI) –Estabelesimentu Ensinu Privadu, Eskola São Pedro (ESP) Comoro, disponibiliza ona biblioteka manuál no dijitál ba estudante Ensinu Báziku Terseiru Siklu no Sekundáriu sira hodi fasilita no apoiu liután prosesu peskiza.

“Ami iha biblioteka rua, manuál no dijitál, ida ne’e meius ida atu ajuda estudante sira  em termos de iha prosesu peskiza nian,” dehan Diretór Eskola, Pe. Aderito Manuel Victor ba Ajénsia TATOLI, iha ESP Comoro, kuarta  (13/11/2019).

Amu Aderito esplika, politika interna hamosu biblioteka dijitál ne’e tanba dala barak biblioteka manuál ne’ebė konsentra iha eskola dala barak hasoru obstakúlu tanba livru sira ne’ebė iha barak mak nakles no dodok. Ne’e duni, eskola kria alternativu ne’e hodi ajuda  estudante sira bele asesu liuhusi sira-nia telemovel android.“Ita fó ona oportunidade atu estudante sira bele asesu informasaun iha sira-nia telemovel maibé tenke android atu nune’e bele asesu di´ak liután”.

Tuir amu, ho maneira sira ne’e hotu estudante sira ne’e hatudu sirania kualidade. “Dala barak kuandu sira partisipa iha eventu ruma estudante São Pedro sempre hetan apresiasaun bo’ot,” konsidera manorin na´in ne´e.

Diretór ESP Comoro, Pe. Aderito Manuel Victor  informa mós katak eskola ne´emós iha kalendáriu anuál ne´ebé planeadu ona ho atividade ekstra-kurrikuler nian ne´ebé ejize estudante sira tenke prienxa iha kada fulan mak hanesan múzika, jornál parede, dansa, desportu no atividade kalan kulturál (noite cultural).

Atividade sira ne’e tuir Pe.Aderito organiza husi estudante sira ne’ebė envolve aan iha Konsellu Estudante hamutuk ho profesór ne’ebė tutela, sira mak trasa planu depois mak relata mai diretór eskola hodi hetan aprovasaun.

“Movimentu iha Eskola São Pedro bele dehan ida-idak iha ona ninia atividade agora eskola hein de’it ninia rezultadu implementassun oinsá. Kuandu iha obstakulu ka fallansu ruma mak Konsellu Estudante liuhusi profesór refere aprejenta mai diretór,” nia konklui.

Notísia relevante:Estudante São Pedro Aplika Teória Sismógrafu Sukat Amplitude Rai Nakdoko

Jornalista : Tomė Amado

Editór       : Rafy Belo

HAKEREK NO HATÁN

Please enter your comment!
Please enter your name here