Ahi han Merkadu Munisípiu Liquiça, tersa (29/10/2019). Imajen/SEPS Munisípiu Liquiça

DILI, 13 novembru 2019 (TATOLI)-Ekipa interministeriál  ba Unidade Protesaun Sivíl no Jestaun Dezastre Naturaís iha loron 12 fulan Novembru, dezloka ona ba Munisípiu Ermera, Liquiça, Bobonaro ho Aileu, hodi verifika loloos  dadus kona-ba afetadu hosi  ahi han uma, plantasaun, anin sobu no seluk tan ne’ebé akontese durante 2019.

Notísia Relevante      : Governu Sei Distribui Apoiu ba Vítima Dezastre Uma Kain 1.881

Komunikadu imprensa ne’ebé TATOLI asesu hosi Sekretáriu Estadu Protesaun Sivíl, ohin, relata katak, ekipa nasionál ne’e sei servisu hamutuk ho ekipa hosi kada munisípiu afetadu hodi hetan superviziona direta hosi Prezidente Autoridade Munisípiu durante loron rua hahú Kuarta-Kinta  (13-14/11/2019).

Objetivu hosi asesmentu ne’e maka atu hetan dadus konkreta ba vítima afetadu hosi dezastre naturaís, hanesan ahi han uma, plantasaun, animal, ema hira ne’ebé afetadu, liuliu labarik estudante ho ema defisiénsia sira

Notísia Relevante : PM Orienta MAP Prepara Dadus ba Plantasaun Kafé Ne’ebé Hetan Estragu

Hosi dadus hirak ne’ebé interministeriál hetan iha terrenu, Prezidente Autoridade sei analiza hodi aprova hafoin kontinua aprezenta ba Governu sentrál hodi fó apoiu ho lalais.

Hosi asesmentu ne’e, Governu bele hetan informasaun detallu hosi komunidade rasik kona-ba dezastre naturaís refere, tanba dala-ruma dezastre hirak ne’e, akontese tanba ema ninia hahalok.

Notísia Relevante      : Ahi Han Uma 664 iha Munisípiu Sia

Ekipa interministeriál ne’e mai hosi Ministériu Administrasaun Estatál, Ministériu Interiór, Ministériu Solidariedade Sosiál no Inkluzaun (MSSI), Ministériu Transporte  no Telekomunikasaun, Ministériu Agrikultura no Peska, Sekretáriu Estadu Protesaun Sivíl, Sekretáriu Estadu Komunikasaun Sosiál (SECOMS –sigla Portugés), FALINTIL-Forsa Defeza Timor-Leste (F-FDTL), Polisia Nasionál Timor-Leste, Diresaun Sentru Integradu Jestaun Krize, Diresaun Nasionál Servisu Intelijénsia, Konsellu Administrasaun Institutu Nasionál Aviasaun Timor-Leste.

Notísia Relevante      : Governu Distribui Apoiu ba Vítima Inséndiu iha Liquiça ho Ermera

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here