Prezidente interinu Autoridade RAEOA-ZEESM sesante, Arsénio Paixão Bano, bainhira partisipa iha seremónia pose Prezidente Autoridade, José Luís Guterres ‘Lugu’, iha Palásiu Governu, kuarta ne’e. Imajen/António Gonçalves

DILI, 13 novembru 2019 (TATOLI) – Prezidente Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM) interinu sesante, Arsénio Paixão Bano, hateten, nia parte prontu koopera ho Prezidente Autoridade foun durante prosesu tranzisaun.

Arsénio asume kna’ar nu’udar Prezidente Autoridade Interinu durante loron 120, hahú 1 agostu 2019, hodi troka mandatu Prezidente Autoridade sesante, Marí Alkatiri, ne’ebé ramata ninia mandatu iha loron 30 jullu 2019.

“Ha’u respeita agora iha ona Prezidente foun no ha’u husu ona atu ami na’in rua bele ko’alia minutu balun atu diskute saida maka atu halo ba oin durante prosesu tranzisaun. Ha’u laiha problema no sempre prontu serbisu hamutuk. Ha’u sujere ba nia atu bele hakerek karta ba Prezidente sesante, Marí Alkatiri hodi husu apoiu, maibé ida ne’e hanesan sujestaun ida no ha’u hanoin laiha problema,”dehan Arsénio iha Palásiu Governu, kuarta ne’e.

Antes hetan fiar sai Prezidente Autoridade Interinu, Arsénio Paixão Bano asume kna’ar nu’udar Sekretáriu Rejionál Adjuntu prezidente Autoridade ba área Edukasaun, Sosiál no Saúde iha Oé-Cusse.

Primeiru Ministru Taur Matan Ruak (klaran) kaer liman ho Jose Luis Guterres no Arsenio Bano hafoin Jose Luis simu pose nudar Presidente RAEOA-ZEEMS iha Palacio Governu ,Kuarta 13 Novembru 2019. Imajen/Antonio Goncalves

Nia hatutan, planu ne’ebé aprezenta ona ba Prezidente Autoridade foun, José Luís Guterres ‘Lugu’ maka hanesan Primeiru-Ministru, Taur Matan Ruak hateten iha seremónia pose katak buat ne’ebé maka iha ona kontinua no buat ne’ebé ladiak presiza hadi’a.

“Ha’u sesante prontu atu ajuda la’ós de’it tanba sesante maibé nu’udar Oé-Cusse oan, hakarak rai ne’e la’o ba oin”, nia haklaken.

Nune’e, nia iha eperansa ba Lugu hodi kontinua nafatin serbisu ne’ebé durante ne’e la’o ona.

“Ha’u hakarak kontinua serbisu ne’ebé maka ita iha ona, presiza urjentemente halo buat ruma atu osan bele sirkula fali, nune’e modo no naan sira bele folin no sasan iha kios sira mós bele folin hotu”, nia akresenta.

Arsénio haktuir, kona-ba ninia mandatu durante ne’e, sasan barak maka la’o ona no sasan barak mós maka seidauk halo hanesan estrada ba Wainunu ba Oesilo no bee moos, ne’ebé hanesan programa ne’ebé Prezidente Autoridade sesante, Marí Alkatiri nian.

Tuir nia, durante ne’e povu Oé-Cusse asesu ona ba eletrisidade to’o porsentu 99.

“Parese família 500 to’o 800 husi totál uma-kain 15.000 maka seidauk asesu ba eletrisidade tanba sira hela liu iha foho leten ka sira ne’ebé hela iha área  izoladu ne’e maka seidauk  hetan”, nia haklaken.

Nia informa, daudaun ne’e povu Oé-Cusse presiza liu maka bee moos, edukasaun no saúde, inklui turizmu mós tenke kontinua la’o.

“Ita hakarak halo Oé-Cusse sustentável no auto-finansiamentu, tanba ne’e ita tenke hadi’a infraestrutura hodi halo Oé-Cusse sai furak liután, hodi loron ida iha reseita sufisiente. Reseita ne’ebé agora iha ona millaun $34, bele halo tan atu loron ida Oé-Cusse bele kontribui mós ba reseita nasionál. Ida-ne’e maka ita hakarak”, nia subliña.

Arsénio rekoñese, orsamentu 2020 ne’ebé foin lalais propoin ba RAEOA-ZEESM   ne’e oituan, tanba ne’e Prezidente foun presiza iha polítika di’ak ida atu osan bele aumenta tanba nesesidade sei barak tebes.

Biban ne’e, nia mós refere uitoan kona-ba dezenvolvimentu Ataúro ne’ebé presiza lejizlasaun.

“Kona-ba atu dezenvolve Ataúro, ita presiza maka Prezidente Autoridade no Governu Sentrál atu halo estatutu nune’e bele hahú dezenvolvimentu iha Ataúro”, nia dehan tan.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here