Hapara Violensia Bazeia ba Jenéru. Imajen/Foti hosi Google

DILI, 13 novembru 2019 (TATOLI) -Tribunál Distritál Dili (TDD), liu hosi desizaun final, ohin, hatún pena suspensaun tinan ida  fulan neen ba arguido “Abílio de Araújo” ho nia kaben Claudina dos Santos, tanba hamutuk baku lezada Rita dos Santos, nu’udar Abílio nia inan rasik.

Iha leitura akórdaun ne’e, juiz ba prosesu informa katak, faktu ne’ebé konsta iha akuzasaun hosi Ministériu Públiku, arguido sira konfesa integralmente, maioria aprovadu hotu, hahalok hosi arguido sira nian prienxe duni rekizitu elementu krime ne’ebé imputa ba arguido sira.

Tribunál mós prova katak hahalok arguido na’in rua, “Abílio de Araujo” (oan mane) ho Claudina dos Santos (feto foun), halo lezada hetan moras no bubu ne’ebé ikus mai lezada ba halo tratamentu iha ospitál.

Tribunál mós haree katak, krime violénsia doméstika (VD) mós aas tebes iha Timor, tanba ne’e aplika pena prizaun fulan neen, suspende ba tinan ida (1) arguido sira la selu kustu judisiáriu.

Ho pena ne’e signifika arguido sira sei la kumpre ka dadur iha prizaun laran, maibé durante tinan ida nia laran depois desizaun Tribunál ne’e, arguido sira labele komete tan kualkér krime. Bainhira halo krime tan iha prazu tinan ida nia laran maka sira tenke dadur iha prizaun laran durante fulan neen tuir pena ne’ebé aplika ona ba sira.

Tuir kronolojia katak, iha tinan 2018, maizumenus tuku 06:00 Otl, iha Liquiça, Suku Daru Lete, Aldeia Kailili, arguido Abílio de Araújo, hanesan oan mane hosi lezada Rita dos Santos, ho arguida Claudina dos Santos hanesan feto foun baku lezada tanba ba ku’u fali kafé ne’ebé arguido na’in rua hamoos ona.

Arguida Claudina foti ai-pedasuk baku iha lezada nia ulun, no arguido Abílio kontinua mai basa kedas iha lezada nia hasan sorin loos.

Konsekuénsia hosi arguido sira nia hahalok, halo lezada hetan moras no bubu iha fatin ne’ebé sira baku. Lezada mós ba halo tratamentu iha ospitál.

Husi hahalok sira ne’e Ministériu públiku akuza arguido sira hanesan autór material ho forma konsumada ba krime violénsia doméstika kombina ho offenses integridade fízika simples ne’ebé previstu iha artigu 145 kódigu penál, lei violénsia doméstika númeru 5/2017.

Audiénsia julgamentu prezide hosi Juis Afonso Carmona, Ministériu Públiku reprezenta Prokuradór Estajiáriu no arguido sira hetan asisténsia legál hosi Defensora Públika, Marcia Sarmento.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here