Prezidente Repúblika, Francisco Guterres Lú Olo. Imajen /TATOLI

DILI, 12 novembru 2019 (TATOLI)–Prezidente Repúblika (PR), Francisco Guterres Lú Olo, husu joven sira atu fiar-aan hodi prepara hadi’a futuru. 

Prezidente Repúblika husu ne’e liuhusi diskursu komemorasaun Loron Nasionál Juventude 12 Novembru 2019 iha Semitériu Santa Cruz, Dili, tersa ne’e.

Xefe Estadu dehan, ohin rai livre no independente ona! Nasaun tomak tenke rekoñese no hahí duni korajen husi Loriku Asuwa’in sira ne’ebé fakar sira-nia raan iha Santa Cruz, maibé, rekoñese de’it la to’o.

Nia hatutan, juventude no hotu-hotu tenke halo kompromisu onra ho sira hotu ne’ebé mate iha funu, tanba kna’ar foinsa’e sira-nian seidauk ramata.

Xefe Estadu informa mós katak populasaun liu pursentu hitu-nulu (70) maka iha otas tinan tolu-nulu resin haat (34) ba kraik.

“Ami hotu tau ami-nia fiar ba imi hodi hatutan kompromisu ida-ne’e iha ita-nia nasaun livre no independente liuhusi imi-nia kontributu ba dezenvolvimentu nasionál no luta hasoru ki’ak no mukit ne’ebé sei hanehan ita-nia povu”, nia hateten.

Prezidente Repúblika salienta, atu valoriza ukun rasik-aan no kombate ki’ak tenke sai projetu nasionál ida-ne’ebé envolve timoroan hotu-hotu.

Xefe Estadu mós fiar katak bele manán luta ida-ne’e tanba Timor iha rekursu finanseiru, hetan reseita husi mina-rai no gás, maibé dalaruma timoroan sira liuliu nai-ulun sira la hili dalan ida-ne’ebé fó atensaun aas ba ema no dezenvolvimentu umanu.

“Ita hili de’it dalan atu fó valór boot ba osan nu’udar soin, la’ós ema maka ita presiza fó valór ba futuru rai ida-ne’e atu hametin no hatutan obra boot husi ita-nia Erói no Mártir sira! Atu halo nune’e, ita presiza mak, hanesan iha tempu luta libertasaun nasionál, hakarak-rasik, dedikasaun, konsisténsia no persisténsia ho prinsípiu no uza osan mina-rai nian, ho matenek, atu hadi’a ita-nia povu nia moris di’ak husi aspetu oioin no diversifika liután no lalais ita-nia ekonomia”, nia hatutan.

“Imi, foin-sa’e sira tenke kontribui ba ida-ne’e no prepara imi-nia aan didi’ak ba futuru. Prezidente Repúblika hatene katak maioria foinsa’e sira moris ho kondisaun simples tebes, ho nível edukasaun formál ladún aas, maibé imi tenke fiar iha imi-nia aan rasik. Imi tenke buka dalan hodi hadi’ak loron ohin nian no nune’e bele hanoin ba aban-bainrua”, Lú Olo subliña.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here