Mariano Assanami Sabino. Imajen/Antonio Goncalves

DILI,12 novembru 2019 (TATOLI) – Prezidente Partidu Demokrátiku (PD), Mariano Assanami Sabino, husu ba Prezidente Região Administrativa Especial Oe-cusse Ambeno no Zona Ekonomia Espesiál Merkadu Sosiál (RAEOA-ZEEMS) foun, José Luis Guterres, tenke hatudu espíritu jestaun no lideransa durante nia mandatu.

Tanba ezisténsia RAEOA-ZEEMS hanesan projetu ida ne’ebé ho kompromisu nasaun nian, entaun se de’it maka troka malu, importante maka tenke kontinua programa ne’ebé iha ona.

“Tanba ne’e prezidente foun RAEOA-ZEEMS, ha’u hanoin tenke hatudu jestaun ne’ebé di’ak no hatudu lideransa durante lidera RAEOA”, dehan Assanami hafoin partisipa data markante Masakre Santa Krús, ohin.

Tuir deputadu PD ne’e katak labele troka buat hotu-hotu kuandu sa’e, maibé iha kontestu kontrusaun nasaun tenke hametin liután ukun rasik aan, la’ós sobu ida ne’e maka importante.

“Líder hotu-hotu presiza iha konxiénsia katak rai ida ne’e ema barak maka mate, konxiénsia prinsipál maka halo saida maka di’ak liu, halo oinsá maka bele hametin ukun rasik”, dehan nia.

Iha fatin hanesan, Prezidente Komité 12 Novembru, Gregório Saldanha, fó ona parabéns ba Jose Luis Guterres via-facebook, hein katak prezidente kontinua serbisu ne’ebé iha ona no halo kompletu liután.

Notísia relevante : Governu Nomea José Luís ba RAEOA Tanba iha Esperiénsia Ukun

Lugu: “Ha’u bá Serbí Povu Oé-Cusse”

Jornalista : Natalino Costa 
Editora : Maria Auxiliadora

HAKEREK NO HATÁN

Please enter your comment!
Please enter your name here