Selebrasaun Misa, ohin, iha Igreja Motaél, Dili, hodi halo reflesaun ba loron istoriku Masakre Santa Krús 1991. Imajen/Rob Baird

DILI, 12 novembru 2019 (TATOLI)-“Nasaun ne’ebé di’ak, nasaun ne’ebé hatene valoriza nia eroi no nia istória.”

Mate Restu ho familia sira hola parte iha Misa komemorasaun Masakre Santa Krús iha Igreja Motaél, Dili, tersa (12/11/2019). Imajen/Rob Baird

Fraze hirak ne’e mak sai hanesan foku mensajen hosi Amu Selebrante ba Misa Solene ba komemorasaun Loron Juventude Nasional, 12 novembru 2019,  Pe. Guilhermino da Silva, iha nia omilia iha Igreja Motaél, Dili.

Tebes. Timor-Leste nia ukun-an la’ós  oferta iha bandeja laran, maibé soi ho sakrifisiu, mate, ruin no ran hosi eroi rihun ua’in. Tanba ne’e, Amu Guilhermino da Silva, fó hanoin fali atu Timor-oan hotu merese respeitu  no onra ba eroi no istória luta Timor-Leste nian.

“Ita, ohin, selebra daudaun loron importante tebes ne’ebé marka istória ukun-an nian ne’ebé koñesidu ho naran Masakre Santa Krús, 12 Novembru 1991. Eroi sira nia sakrifisiu no dedikasaun fó mai ita direitu liberdade. Ita merese agradese no valoriza obra lulik ida ne’e hodi servisu ba luta libertasaun patria no povu hosi ki’ak, mukit no marjinalizadu,” afirma Amu Pároku Santo António Motaél, Dili.

Estudante no joventude sira ho orgullu partisipa komemorasaun loron Masakre Santa Krús 1991 hodi loriimajen saudozu sira nian la’o ain hosi Igreja Motaél ba to’o Semiteriu Santa Krús, Dili, tersa (12/11/2019). Imajen/Rob Baird

Iha ukun-an ne’e, Amu Guilhermino hateten, prémiu boot ne’ebé merese Timor-oan atu dedika ba eroi sira mak respeita no agradese ba funu na’in sira hodi aselera dezenvolvimentu nasionál ba Timor-oan hotu nia di’ak no ba Timor-oan hotu nia prosperidade iguál.

Knaar no responsabilidade ba nasaun ne’e ohin loron , tuir Amo Guilhermino, mak kontinua vitória funu libertasaun nian iha liberdade nia laran. Partisipasaun iha dezenvolvimentu nasaun independénsia kontén sentidu kuidadu unidade nu’udar povu nasaun nian hodi tau matan ba natureza, justisa no tau matan ba kriasaun Maromak nian ho justu.

Ho misa reflesaun Masakre Santu Krús ba tinan ne’e, Amu Guilhermino mensiona katak, iha faze ukun-an ne’e kaer ba prinsípiu “Buat Ne’ebé Cesar nian fó ba Cesar no buat ne’ebé Maromak Nian fó ba Maromak.” Katak ,sidadaun hotu no Timor-oan hotu iha obrigasaun atu halo di’ak ba nasaun tuir ida-idak nia kbiit no nia kapasidade.

“Se ita hala’o ho di’ak no  ekilíbriu ba ita nia rai no ba ita nia maluk sira, ita-nia moris hetan di’ak iha mundu ne’e no iha loron ikus,” hateten Amu Guilhermino.

Tenke Onestidade

Hosi sorin seluk, mate restu Masakre Santa Krús 1991, Ato Lekinawa Costa, ba Ajénsia TATOLI hateten,  liberdade ne’ebé soi ho ran, ruin no mate, tenke kontinua mantén iha nasaun doben ida ne’e.

“Ha’u mós hatete katak atu prienxe ukun-an ida ne’e, labele ezije hela direitu, maibé tenke onestidade,” hateten Ato Lekinawa Costa, hafoin partisipa selebrasaun misa ba komemorasaun Masakre Santa Krús ne’e.

Nia husu ba joven sira katak labele abuza ho ukun rasik aan. Prátika ne’e dehan, se lei hatete katak motorista sira kuandu lori motor tenke uza kapasete no mós kuandu lampu kór mean motorista tenke para, maka tenke kumpre.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here