Prezidente Repúblika, Francisco Guterres Lú Olo. Imajen/TATOLI

DILI, 12 novembru 2019 (TATOLI)–Prezidente Repúblika, Francisco Guterres Lú Olo rejeita hodi deklara la husu opiniaun ba embaxadór Brazíl iha Timor-Leste kona-ba oinsá rezolve problema impase polítika ne’ebé akontese hela iha nasaun ne’e.

“Lae! Ha’u la husu opiniaun públika no mós la husu problema impase polítika ninian ba iha embaxadór ida,” Lú Olo dehan iha Semitériu Santa Cruz, Dili, tersa ne’e.

Lee mós: Embaixadór Brazíl: EA La’ós Solusaun Di’ak ba Impase Polítika

Nia dehan, Prezidente Repúblika hanesan mós xefe ba diplomasia. Tanba ne’e, nia parte tenke ko’alia ho embaixadór hotu-hotu kona-ba situasaun rai-laran ne’ebé la’o hela nune’e fó konfiansa nafatin hodi hametin di’ak liután relasaun embaxadór ida-idak nia nasaun ho Timor-Leste.

Maibé, antes ne’e, embaxadór Brazíl iha Timor-Leste deklara, nia parte hasoru malu ho Prezidente Repúblika ko’alia mós kona-ba impase polítika ne’ebé la’o hela iha Timor-Leste.

Entretantu, fó hanoin fali, impase polítika akontese iha nasaun ne’e hahú iha tinan 2017 no to’o ohin loron seidauk iha nia rohan.

Tanba ne’e, Prezidente Repúblika tenik, dalan mak diálogu entre líder hotu maibé buat hotu la’o tuir tempu.

“Buat hotu ita sei bele túr hamutuk liuhosi diálogu atu ita bele ultrapasa situasaun ida-ne’e para dezenvolvimentu bele la’o ho di’ak. Ida-ne’e mak importante,” ema númeru ida iha Timor-Leste ne’e tenik.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here