Gregorio Saldanha, Presidenti Komite 12 Novembru.Imajen/Antonio G.

DILI, 12 novembru 2019 (TATOLI) – Prezidente Komité 12 Novembru (K12N), Gregório Saldanha, hateten sei identifika sobrevivente sira ne’ebé kontribui ona ba prosesu dezenvolvimentu ekonómiku iha rai-laran.

“Ami sei halo identifikasaun tanba ha’u-nia kolega sira barak, maibé ami seidauk iha baze dadus ka númeru sertu ida, maibé ida ne’e importante ba ami-nia serbisu”, Gregório ba jornalista sira iha data markante Masakre Santa Krús no Loron Nasional Juventude ne’ebé halo iha Balidi, ohin.

Tuir nia katak Komité 12 Novembru la lembra kona-ba sobrevivente hira maka kontribui ona ba prosesu dezenvolvimentu ekonómiku Timor-Leste, maibé sei presiza dadus serteza atu bele hatene sé mak presiza apoiu no sé maka presiza dudu tan ba oin.

Nia apela ba juventude loriku asua’in atu serbisu maka’as atu buka dalan lisuk ba dezenvolvimentu, tanba Governu fó konfiansa ba mate restu 12 Novembru atu aproveita halo serbisu ho di’ak no kualidade, nune’e povu bele hetan benefísiu.

Hodi apela mós ba sobrevivente sira atu kontribui ba pás no establidade iha sosiadade nia laran, atu garante armonia tenke kontribui seguransa iha bairru-laran kuandu joven sira halo problema, ajuda hodi rezolve problema no lalika hein Polísia maka rezolve.

Jornalista : Natalino Costa 
Editora : Maria Auxiliadora

HAKEREK NO HATÁN

Please enter your comment!
Please enter your name here