Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 12 novembru 2019 (TATOLI)–Ho Komemorasaun Masakre 12 Novembru no Loron Nasionál Juventude iha tinan ida-ne’e, hein katak bele motiva liután joven sira atu tau aas interese nasionál aas liu interese individuál.

“Ha’u hein katak ho komemorasaun ne’e bele motiva joven sira atu reflete ba tempu pasadu katak maski diferensa ideia maibé importante mak tau interese nasionál nune’e bele lori dezenvolvimentu mai nasaun ne’e”, Prezidente Parlamentu Nasionál, Arão Noé de Jesus da Costa Amaral hato’o mensajen ne’e hafoin partisipa iha Komemorasaun Masakre 12 Novembru ba dala-28 no Selebrasaun Loron Nasionál Juventude ho tema “Juventude Mak Futuru, Autór Ba Unidade no Dezenvolvimentu Nasionál”, iha Semitériu Santa Cruz, Dili, tersa ne’e.

Araó Noé hakarak informa ba juventude sira katak sein estabilidade dezenvolvimentu sei laiha, tanba ne’e estabilidade depende ba timoroan hotu.

“Agora ita rona konflitu barak, balun mate. Ha’u hanoin ho komemorasaun ida ohin joven sira bele fó liman ba malu nune’e bele atinje mehi ida liberta ki’ak no mukit”, nia fó hanoin.

Nia haktuir, juventude iha tempu rezisténsia nia papél atinjidu tanba liberta ona pátria no nia hein katak juventude iha otas ida agora nian bele hatutan mehi ida-ne’e atu kontribui liberta povu hosi ki’ak no mukit.

Jornalista: Evaristo Soares Martins

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here