Prezidente Repúblika, Francisco Guterres Lú Olo. Imajen Tatoli/António Gonçalves

DILI, 12 novembru 2019 (TATOLI) – Durante diskursu komemorasaun Loron Nasionál Juventude 12 Novembru 2019 iha Semitériu Santa Cruz, Dili, ohin, Prezidente Repúblika (PR), Francisco Guterres Lú Olo, husu joven sira atu kaer metin valór unidade, diálogu onestu, krítika no autokrítika, nu’udár baze hodi dezenvolve nasaun iha futuru.

“Valór hanesan unidade, diálogu onestu, krítika no autokrítika ne’ebé uluk ajuda ita hodi hamutuk alkansa independénsia ba ita-nia rai, imi foinsa’e sira tenke kuda nafatin ohin loron iha imi-nia laran no fuan. Valór sira ne’e halo ita sai esperiente, maduru no responsável iha ita-nia sosiedade! Krítika no autokrítika lori ita ta’is hanoin, liafuan no hahalok. La hanesan ho insulta malu, baku malu no oho malu lahó motivu!”, nia esklarese.

Xefe Estadu esplika detalla katak diálogu onestu sai hanesan fio-de-prumu ne’ebé hodi sukat karáter umanu no sidadania atu ko’alia ema ba ema.

Aleinde ne’e, Prezidente Repúblika hatutan unidade sai nu’udár baze ka riin ba nasaun ho identidade rasik, nune’e demokrasia no liberdade sai sasukat ba respeita diferensa.

Tanba ne’e, nia fó hanoin katak hateke ba oin importante tebes, maibé labele haluha pasadu ida-ne’ebé rai hela esperiénsia no valór barak ba timoroan hotu!

“Ita ohin afirma-aan nu’udár nasaun soberana no independente no nu’udár povu. Ne’e loos! Maibé, afirmasaun ida-ne’e ita tenke hametin hosi ida-idak no husi hotu-hotu nia hakarak, hodi hatutan no hametin hanoin no hahalok husi hori uluk to’o ohin loron. Saida mak ita sai ohin ita debe ba ita-nia pasadu. Ita presiza fó liman ba malu nafatin no haree ba futuru ho fiar katak hamutuk ita sei nakfila ba realidade ita-nia mehi koletivu: hasa’e moris-di’ak ba Povu tomak! No, luta hasoru mukit no ki’ak!”, Prezidente Repúblika mensiona.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here