Prezidente Repúblika, Francisco Guterres Lú Olo. Imajen/TATOLI

DILI, 12 novembru 2019 ( TATOLI)–Arsénio Cabral, joven ida husi Munisípiu Lautém ne’ebé ho inisiativa harii fábrika mina-nuu, sai referénsia ba Prezidente Repúblika (PR), Francisco Guterres Lú Olo, iha diskursu Komemorasaun Loron Nasionál Juventude, 12 Novembru, iha Semitériu Santa Cruz, ohin.

Xefe Estadu konta tuir katak, iha fulan kotuk, nia hala’o vizita ba Munisípiu Lautém hodi hasoru no ko’alia ho populasaun.

Ezemplu di’ak ida husi foinsa’e ne’e, Prezidente Repúblika hetan iha ne’ebá (Lautém) no Prezidente hakarak hato’o ba maluk sira hotu.

Tanba ne’e, Prezidente haktuir kona-ba Arsénio Cabral ne’ebé serbisu durante tinan-10 iha Inglaterra atu manán esperiénsia iha área ai-han ijiéniku nian no halibur osan uitoan hodi fila mai nia rai-doben hahú fila-liman iha nia suku rasik.

“Joven ne’e harii fábrika mina-nuu hamutuk ho nia belun Australianu ho apoiu husi Governu Australianu. Ohin loron, nuu sira iha Lospalos hahú iha folin. Fábrika ne’e fó serbisu ba traballadora na’in-12 ne’ebé serbisu troka malu, hahú husi tuku 4 dadersan to’o tuku 12 kalan, atu prodús mina-nuu litru rihun-rua atus-tolu haat-nulu (2340), iha ne’ebé fulafulan esporta ba Austrália. Fa’an ho presu $12.00/litru ida. Fó serbisu ba nia maluk timoroan sira no fó folin ba ita-nia produtu lokál”, Xefe Estadu subliña.

Prezidente Repúblika mós sita ezemplu seluk ida mai duni husi sobrevivente ida husi Masakre Santa Cruz, César Lourdes.

César konsege bá Portugal no esperiénsia ne’ebé nia hetan iha ne’ebá filafali mai ita-nia rai doben Timor-Leste loke nia restaurante rasik. Nia mak sai duni xefe ba nia dapur, hetan moris rasik no fó serbisu ba nia maluk sira seluk.

“Ha’ u temi ezemplu sira ne’e hodi fó-hanoin ba foinsa’e sira hotu atu labele lakon konfiansa ba imi-nia aan rasik! Imi tenke kontinua hakbiit-aan atu ita konkretiza mehi ba nasaun ida-ne’e. Imi foinsa’ e tenke hamosu hanoin no mentalidade foun hodi hatene saida mak moris di’ak. Muda imi-nia hanoin importante tebes, molok hanoin ne’e nakfilak ba realidade. Dalan ida-ne’e mak di’akliu hodi ita hotu valoriza loloos Juventude Lorico Asuwa’in no maluk sira seluk ne’ebé fó sira-nia moris hodi ohin ita bele moris livre no independente!”, nia hateten.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here