APF hamutuk ho estudante hosi Eskola Sekundária São Pedro, Eskola Paulo VI, Eskola Nobel da Paz, Eskola 4 Setembru no seluk tan, hala’o marsa saudavel hodi komemora loron nasionál juventude, 12 novembru 2019. Imajen/Nelson de Sousa

DILI, 12 novembru 2019 (TATOLI)-Alumni Parlamentu Foin-sa’e (APF) hamutuk ho estudante hosi Eskola Sekundária São Pedro, Eskola  Paulo VI, Eskola Nobel da Paz, Eskola 4 Setembru no seluk tan, hala’o marsa saudavel hodi komemora loron nasionál juventude, 12 novembru 2019.

Notísia Relevante : Lorico Adventure Hala’o Tour “Dalan ba Memória”

Marsa saudavel ne’e akompaña ho drum band  hosi estudante Eskola São Pedro, Eskola Paulo VI, hahú hosi Igreja Motaél nia oin to’o iha edifísiu Sekretária Estadu Juventude no Desportu (SEJD).

Xefe Divizaun Alumni Parlamentu Foin-sa’e, Umbelina Conceição. Imajen/Nelson de Sousa

Xefe Divizaun  Alumni Parlamentu Foin-sa’e,  Umbelina Conceição, informa, sentidu hosi   marsa saudavel ne’e  atu festeja  loron nasionál juventude.

Tuir nia, iha tempu luta libertasaun, juventude loriku asua’in hatudu sira nia asaun eroiku  no brani tebes hodi fó-an ba mate soi ukun rasik-an. Tanba ne’e, juventude jerasaun kontinuadór tenke hatudu sira nia matenek hodi kontribui ba dezenvolvimentu nasionál.

Marsiana da Costa nu’udar estudante hosi Eskola  São Miguel, kontente ho komemorasaun loron nasionál juventude hodi dignifika paple juventude nian iha luta libertasaun no konsiderasaun ba juventude hanesan jerasaun kontinuadór nasaun ida ne’e nian.

Nia husu ba nia juventude maluk sira atu estuda no aproveita tempu hodi prienxe ukun rasik-an ne’e hodi sai eroi foun ba dezenvolvimentu.

Romão da Crus, estudante Eskola Sekundária 04 Setembru,  husu ba oitavu Governu liuhosi Ministériu Edukasaun, Juventude no Desportu,  atu kontinua investe iha area edukasaun hodi forma joven timor-oan ba futuru ho kualidade iha merkadu traballu.

Komemorasaun loron nasionál juventude ba tinan ne’e prienxe ho atividade kompetisaun pintura, jornál Parede no seluk tan. Atividade hirak ne’e hotu apoia orsamentu hosi Sekretária Estadu Juventude no Desportu (SEJD) ho montante $132.000.00 no  parseiru Gesellschat Internasionale Zusammenarbat   (GIZ) $14.099.00.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here