Embaixadór Brazíl iha Timor-Leste, Adelmo Serafin Garcia. Imajen Tatoli/Tatoli Egas Cristóvão

DILI, 11 novembru 2019 (TATOLI) – Prezidente Repúblika (PR), Francisco Guterres Lú Olo agradese ba Estadu Brazíl, tanba dezde ukun-aan to’o ohin loron, kontinua fó apoiu ba Timor-Leste iha setór oioin. 

Embaixadór Brazíl iha Timor-Leste, Aldemo Serafin Garcia Junior, tranzmite liafuan Xefe Estadu ne’e, hafoin enkontru iha Palásiu Prezidensiál Nicolau Lobato, Dili, ohin.

“Prezidente Repúblika, Francisco Guterres Lú Olo agradese ba Brazíl tanba kooperasaun ne’ebé durante ne’e ita iha ona, kooperasaun ida-ne’ebé hahú kedas dezde independénsia Timor-Leste nian, ita iha kooperasaun iha setór oioin”, nia esplika ba mídia.

Embaixadór ne’e atualiza katak, durante ne’e, Timor-Leste ho Brazíl estabelese kooperasaun ida forte tebes maka área edukasaun, ne’ebé iha tinan kotuk oferese profesór brazileiru lima nulu resin, mai hanorin lian Portugés ba profesór timoroan sira.

Nia hatutan, aleinde edukasaun, nasaun rua mós iha kooperasaun iha área justisa, halo aperfeisaun ba defensoria públika Timor-Leste nian.

“Liuhusi prezensa defensór brazileiru iha-ne’e, serbisu hamutuk ho defensór sira timoroan nian, ita mós hahú ona hodi halo akordu ho Tribunál Rekursu Timor-Leste nian liuhusi halo doasaun komputadór atus ida ba Tribunál Rekursu”, nia informa.

Aleinde ne’e, Timor-Leste ho Brazíl mós hahú ona halo kooperasaun ho Provedoria Direitu Umanu no Justisa, Komisaun Antí Korrupsaun, serbisu hamutuk mós ho parte administrasaun públika.

“Iha kooperasaun área defeza nian, ita iha ofisiál na’in tolu, ne’ebé serbisu hela iha Ministériu Defeza, hanorin ka oferese treinamentu ba Polísia Militár,” nia haktuir.

Durante enkontru ho Prezidente Repúblika, Embaixadór ne’e hateten, ko’alia oinsá mantein haburas kooperasaun iha futuru.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here