Diretór Diresaun Downstream Autoridade Nasionál Petróleu no Minerál (ANPM), Nelson de Jesus. Imajen/Florencio Miranda Ximenes.

DILI, 11 novembru 2019 (TATOLI) – Diretór Diresaun Downstream Autoridade Nasionál Petróleu no Minerál (ANPM), Nelson de Jesus, dehan daudaun ne’e presu kombustivel iha Timor-Leste la’o normál tuir merkadu internasionál.

“Ita halo duni kontrolu ba presu kombustivel sira iha merkadoria Timor-Leste bainhira kompañia ida hasa’e presu ita notifika sira atu hatún presu tuir presu internasionál”, katak Diretór Nelson iha ámbitu diseminasaun sistema eletróniku ba kompañia importadór sira iha Tower Bar, Fatuhada, ohin.

Nelson de Jesus hatete maski presu kada litru iha postu abastesimentu kombustivel la hanesan tanba depende ba merkadu, maibé sira labele fa’an aas liu hanesan gazóleu sentavu 0.85 no gazolina sentavu 0.95 tuir presu normál.

“Ita haree no observa postu abastesimentu kombustivel balun diferente mak sentavu ida, rua no to’o lima, maibé ita kontrola nafatin atu labele folin diferensa liu ba sentavu 20 to’o 30”, katak.

Nia dehan ba presu en jerál ne’e la’o normál, maski kompañia sira mós haree sira-nia gastu ba operasionál ne’ebé sira aumenta sentavu balun, mas la aas liu presu mundiál.

“Ita labele tau kedan presu padraun ba postu abastesimentu kombustivel katak tenke fa’an ho folin hanesan ida ne’e, ita la regula hanesan ne’e”, katak.

Diretór ne’e salienta presu mina tuir mundiál ne’ebé, ANPM labele hasai nia presu ketak ida ne’ebé ema sosa ho presu ne’ebé iha bele lori mai aumenta uitoan para ema bele hetan netik funan.

“Ita husik sira, mai labele hasai liu presu ne’ebé aas, no durante ne’e la deteta kompañia ne’ebé hasai presu ida aas liu”, nia hakotu.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here