Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 11 novembru 2019 (TATOLI) – Maski seidauk tama diskusaun no votasaun Orsamentu Jerál Estadu (OJE) 2020, maibé Deputadu balun hosi Bankada Governu CNRT deklara ona atu vota kontra tanba konsidera montante orsamentu ba tinan ne’e boot liu no presiza halo redusaun.

Prezidente Parlamentu Nasionál (PPN), Arão Noé de Jesus da Costa Amaral, hateten deklarasaun deputadu sira iha liur ba mídia sira hanesan deklarasaun pesoál, tanba Parlamentu maka hanesan órgaun deliberativu.

“Ne’e bele ideia pesoál deputadu ida nian no la’ós desizaun plenária. Livre atu deputadu ida bele espresa ninia pozisaun maibé tenke tuir regra tanba plenária maka soberanu no iha kompeténsia tomak atu foti desizaun”, tenik PPN iha resintu Parlamentu Nasionál (PN), segunda ne’e.

Notísia Relevante: Deputadu CNRT Deklara Vota Kontra Kuandu La Redúz Proposta OJE 2020

Tuir Deputadu Bankada CNRT ne’e, atu redús ka aumenta orsamentu ne’e kompeténsia deputadu ida-idak nian atu deside.

“Kuandu iha Governu nia liman entaun Governu maka halo (redús ka aumenta), maibé agora kuandu tama ona plenária ne’e iha deputadu no bankada sira-nia liman, enkuantu Prezidente Parlamentu Nasionál hanesan unipesoál ka ema ida ho votu ida labele altera buat ida”, nia akresenta.

Hafoin PN konklui audiénsia públika liuhosi Komisaun Espesializada sira iha kinta semana kotuk, Prezidente Komisaun sira seidauk bele fó sai proposta hosi deputadu sira tanba relatóriu pareser seidauk ramata.

Bainhira relatóriu pareser hosi komisaun sira hotu ona, sei enkamiña ba Komisaun C (Trata Asuntu Finansa Públika) hodi komisaun ne’e bele aprezenta iha plenária.

Vise-Xefe Bankada Parlamentár FRETILIN, Francisco Miranda Branco, informa daudaun ne’e Bankada FRETILIN akompaña de’it elaborasaun relatóriuu iha komisaun sira.

“Ami laiha proposta, ami haree no akompaña de’it kada reprezentasaun. Kada komisaun sei fó kontribuisaun ba relatóriu pareser ne’ebé komisaun C elabora”, akresenta Branco.

Antes ne’e, durante audiénsia públika entre Komisaun ho Ministériu Finansa iha 4 novembru, deputada Bankada CNRT, Virgínia Ana Belo deklara sei vota kontra OJE 2020 bainhira livru panorama orsamentál 2020 la tuir estrutura no aumentu laiha balansu.

Nune’e mós, Deputadu Bankada CNRT, Domingos de Carvalho, hateten bainhira Governu lakohi redús montante orsamentu 2020 ne’ebé boot maka nia parte sei vota kontra

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here