Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 11 novembru 2019 (TATOLI)–Parlamentu Nasionál (PN) hein desizaun Tribunál Rekursu (TR) ba Lei Fundu Petrolífera (LFP) no Lei Atividade Petrolífera (LAP) ne’ebé Prezidente Repúblika, Francisco Guterres ‘Lú Olo’ husu Tribunál Rekursu halo apresiasaun.

Hafoin Parlamentu Nasionál simu notifikasaun hosi Tribunál Rekursu,  Prezidente Parlamentu Nasionál, Arão Noé de Jesus da Coata Amaral fó ona resposta iha loron kinta (7/11) semana kotuk bazeia prazu efetivu loron 5 ne’ebé TR fó.

Nia dehan konteúdu karta resposta ba Tribunál haklara ka esklarese de’it saida mak Parlamentu halo.

Lee mós: Husu Apresiasaun Preventiva LFP-LAP, TR Sei Estuda Argumentu PR no Pareser Hosi PN

“Tuir Parlamentu nia entendimentu katak laiha inskonstitusionalidade ba alterasaun sira ne’e, prenxe konstituisaun. Laiha razaun hateten katak inskonstitusionál maibé ida-ne’e kompeténsia Tribunál Rekursu. Ida-idak defende nia kna’ar tuir konstituisaun haruka. Ita hotu-hotu hein desizaun Tribunál Rekursu nian”, Arão Noé informa ba jornalista sira iha Parlamentu Nasionál, segunda ne’e.

Arão Noé fó-sai katak Prezidente Repúblika sei mantein nafatin hanesan uluk bazeia Konstituisaun RDTL artigu 149.

“Tuir interpretasaun Prezidente Repúblika, alterasaun sira ne’e seidauk prenxe didi’ak, katak sei iha indísiu inskonstitusionál balun. Tanba ne’e mak Prezidente Repúblika haruka fila-fali ba Tribunál Rekursu halo apresiasaun. Agora, ita hein Tribunál nia desizaun”, Arão Noé salienta.

Prezidente Parlamentu Nasionál ne’e subliña katak kuandu apresiasaun Tribunál nian inskonstitusionál, Parlamentu Nasionál bele kontinua apresiasaun no konfirmasaun votu.

“Bele mós alterasaun filafali no haruka filafali ba Prezidente Repúblika, ne’e plenária nia kompeténsia”, nia tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here