Embaixadór Indonézia iha Timor-Leste, Sahat Sitorus. Imajen TATOLI/Cipriano Colo

DILI, 11 novembru 2019 (TATOLI)–Embaixadór Repúblika Indonézia (RI) iha Timor-Leste (TL), Sahat Sitorus konsidera rekonsiliasaun ne’ebé nasaun rua iha, sai hanesan modelu rekonsiliasaun di’akliu iha mundu. 

Sitorus hato’o asuntu ne’e bainhira partisipa programa reuni família hodi hametin identidade no amizade, entre labarik lakon hamutuk na’in-14 ho Governu Timor-Leste no Indonézia ne’ebé hala’o iha salaun Centro Nacional CHEGA!, eis komarka Balide, Dili, segunda ne’e.

Nia dehan, durante mandatu iha Timor-Leste, partispa ona programa hanesan ne’e ba dala tolu, tanba ninia kna’ar prinsipál ida nu’udár embaixadór iha Timor-Leste maka hatutan programa Comissão Verdade e Amizade (CVA) tanba Indonézia ho Timor-Leste sai ona ezemplu di’akliu no lais liu iha mundu kona-ba rekonsiliasaun.

“Ida-ne’e, ba ha’u, primeiru tanba ita hetan intervensaun husi Maromak, tanba ita baibain halo buat hotu ho orasaun, husu Maromak nia intervensaun no hasa’e agradese ba Maromak. Segundu, povu husi nasaun rua sempre iha fuan boot tanba lema ida-ne’ebé hametin ita maka ita ne’e maun alin, maibé, polítika mak hafahe ita iha pasadu. Terseiru, tanba ita-nia ukun-na’in sira-ninia vontade, intensaun di’ak, fuan boot no korajen, liuliu líder karismátiku Kay Rala Xanana Gusmão, ho líder nasionál sira seluk”, nia hateten.

Embaixadór ne’e konsidera rekonsiliasaun sai ezemplu di’ak ba mundu tanba parte Governu rua no mós povu husi nasaun rua sempre hatudu vontade ne’ebé boot no estraórdináriu tebes, hodi fó laran ba malu sein haree ba pasadu.

Sitorus hatutan, vontade boot husi povu no Governu nasaun rua, halo buat ne’ebé todan sai kamaan tiha, ho nia ezemplu konkretu maka iha tinan balun de’it, bele halo buat barak, hanesan realidade ohin loron ho serbisu hamutuk bele lori fila maluk timoroan sira na’in-14 ne’ebé haketak malu ho família durante tinan barak, bele hasoru malu fali.

Aleinde ne’e mós iha tan novidade boot seluk, nia dehan, rezultadu husi vontade polítika nasaun rua, iha tempu badak sei aplika vistu livre ba sidadaun Indonézia atu tama Timor-Leste, no ida-ne’e Sitorus konsidera hanesan vantajen boot ida ba timoroan sira ne’ebé sei hela iha Indonézia fásil atu bele mai vizita família iha Timor.

Sitorus lori Governu Indonézia nia naran hato’o bemvindu ba maluk sira na’in-14 ne’ebé konsege fila mai Timor-Leste hodi hasoru malu ho família.

Nia esplika, objetivu husi programa ne’e, la’ós atu buka ema ida nia sala, maibé oinsá atu lori hikas maluk sira ne’ebé uluk fahe malu ho família durante tempu naruk tanba konsekuénsia funu.

Tanba ne’e, Governu Indonézia ho Timor-Leste mós kontinua iha kompromisu atu serbisu maka’as hodi hatutan serbisu ne’e atu lori hikas maluk sira ne’ebé seidauk fila, no husu ba entidade hotu iha Indonézia atu fó informasaun ba ekipa traballu kona-ba paradeiru maluk timoroan sira.

“Ita apoiu malu ho orasaun atu bele alkansa hamutuk ita-nia objetivu”, nia konvida.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here