Vise-Xefe Bankada FRETILIN, Francisco Miranda Branco. Imajen Tatoli/Egas Cristovão

DILI, 11 novembru 2019 (TATOLI) – Sekretáriu Jerál Frente Revolusionária Timor-Leste Independente (FRETILIN), Marí Alkatiri, vizita Bankada Parlamentár FRETILIN iha Parlamentu Nasionál (PN).

Vizita ne’e hodi hasoru malu ho Xefe Bankada FRETILIN, Aniceto Guterres, Vise-Xefe Bankada Francisco Miranda Branco, inklui deputadu sira hosi bankada refere.

Enkontru ne’e akontese durante kuaze oras ida nia laran no hafoin hasoru malu, Sekretáriu Jerál FRETILIN lakohi fó komuntáriu.

Vise-Xefe Bankada FRETILIN, Francisco Miranda Branco, informa líder partidu istóriku ne’e hakarak rona informasaun hosi deputadu bankada parlamentár kona-ba preparasaun debate orsamentu 2020 nian iha semana oin.

“Hanesan líder partidu mai atu rona informasaun hosi deputadu sira. Ami halo akompañamentu ba relatóriu hotu (orsamentu 2020) ne’ebé daudaun ne’e prepara hosi komisaun sira”, dehan Branco iha resintu PN, segunda ne’e.

Hatán ba pergunta karik hetan orientasaun polítika hosi Sekretáriu Jerál ba diskusaun orsamentu, Branco dehan “ida ne’e kabe ba ami maka deside”.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here