Gregorio Saldanha, Presidenti Komite 12 Novembru.Imajen/Antonio G.

DILI, 11 novembru 2019 (TATOLI)—Prezidente Komite 12 Novembru, Gregorio “Mouris” Saldanha, husu ba jerasaun kontinuadór sira atu la’o hamutuk ho sobrevivente sira iha Timor laran tomak hodi realiza mehi ne’ebe eroi sira husik hela.

Eis-Koordenadór ne’ebé lidera Manifestasaun Pasífika iha 12 Novembru 1991 ne’e hatutan, atu kontinua estafeta husi jerasaun 91 nian, foinsa’e kontinuadór sira tenke badinas no estuda makaas atu sai estudante ida di’ak no bele sai lider foun iha loron aban be sei mai.

“Ha’u husu ba imi hotu atu hasai imi-nia aan husi buat ne’ebe la di’ak hanesan droga, hemu tua, fuma sigarru no oho malu. Imi foinsa’e kontinuadór sira tenke badinas no estuda makaas atu sai estudante ida di’ak no bele sai lider foun iha futuru,” dehan Gregorio Saldanha ba juventude sira iha komemorasaun Loron Nasionál Juventude Ba Dala-14 no Masakre Santa Cruz ba dala-28 iha Centro Convenções Dili, segunda (11/11/2019).

Joven sira, nia hatutan, tenke aproveita oportunidade iha ukun-aan ida ne’e tanba situasaun agora diferensa boot ho tempu okupasaun Indonézia nian. Nia hakruir, iha tempu uluk laiha oportunidade no buat hotu taka ba timoroan sira ne’ebé mak hakarak ukun-aan tan laiha oportunidade ba sira atu aproveita.

Ne’eduni, nia fó hanoin ba juventude sira, agora Timor-Leste sai ona nasaun ida soberanu aproveita ba hodi responde ba mehi eroi sira nian ne’ebé fó ona sira-nia vida ba ukun rasik-aan ida ne’e. Maske, oras ne’e, sira la hamutuk ona ho ita maibé sira-nia espiritu kontinua moris ba nafatin.

Nia esplika, jerasaun kontinuadór 91 ne’e fó hanoin ba jerasaun juventude ohin loron katak, tanba saida mak ohin loron difisil tebes organiza malu iha tempu ida agora buat hotu kompletu. Uluk, buat hotu defisil maibé fasil tebes organiza malu duke agora buat hotu fasil maibé difisil organiza malu ne’e tanba saida.

“Karik, tanba teknolojia ou keta karik tanba problema polítika rai laran. Ida ne’e tenke responde. Nu’udar jerasaun foun tenke matenek. Ne’eduni tenke estuda makaas atu bele halo analiza ba buat ne’ebe di’ak no la di’ak. Ha’u fó korazen ba imi foinsa’e sira atu brani halo krítika ba buat ne’ebé la di’ak atu nune’e bele la’o hamutuk hodi dezenvolve nasaun ida ne’e. Maibé, ha’u husu, foinsa’e sira labele sai fali autór ba konflitus,” nia esplika.

Jornalista : Tomé Amado

Editór        : Rafy Belo.

HAKEREK NO HATÁN

Please enter your comment!
Please enter your name here