Zebra Cross. Imajen/Tatoli

DILI, 11 novembru 2019 (TATOLI) – Diretór Empreza Violet Unipessoal, Lda, Sebastião S. da Silva, rejeita hapara provizóriu serbisu demarkasaun zebra cross ne’ebé fó sai hosi Diresaun Nasionál Transporte no Terrestre (DNTT).

Sebastião esplika DNTT la’ós hapara provizóriu serbisu, maibé empreza (Violet) maka laiha ona tinta ne’ebé sufisiente no sei kontinua serbisu iha finál novembru bainhira tinta mai hosi Malásia.

“Ami-nia tinta ne’ebé durante ne’e uza maka ladún sufisiente ona, nune’e ami hameno tan ona tinta hosi Malásia atu besik mai hafoin kontinua serbisu”, dehan ba Ajénsia Tatoli iha Audian, ohin.

Kona-ba kualidade tinta, nia afirma iha kualidade di’ak, depende rekomendasaun hosi DNTT mai empreza ho marka AASHATO M249-98. Maibé problema maka bainhira empreza hala’o serbisu, implika mós husi movimentasaun transporte inklui udan.

“Alkatraun ida tuan ho foun la hanesan, foun ita pinta oin seluk no tuan oin seluk, tanba tuan ita pinta karreta la’o kedan, ida ne’e maka halo pinta lakon la kleur”, hateten.

Maibé, serbisu ba demarkasaun zebra cross durante ne’e atinje ona porsentu 40 no sei esforsu atu hadi’a tinta balun ne’ebé afeta hosi udan no movimentasaun veíkulu, maibé ida ne’e parte klima Timor-Leste nian.

Enkuantu, kontratu serbisu ne’ebé empreza ho DNTT halo maka durante fulan neen, hahú iha outubru to’o marsu 2020. Empreza sei kumpre kontratu ne’ebé iha ka sei demarka zebra cross hamutuk 275 iha kapitál ho kualidade.

Xefe Departamentu Sinál no Tránzitu Diresaun Nasionál Transporte no Terrestre (DNTT), Ministériu Transporte no Komunikasaun, João Eugénio da Silva, informa foin lalais ne’e, DNTT foti ona desizaun hodi hapara provizóriu atividade empreza Violet ne’ebé demarka “zebra cross”.

Razaun DNTT hapara kompañia ne’e nia atividade tanba atu haree kualidade tinta ne’ebé pinta zebra croos ne’e ho loloos.

Notísia relevante : DNTT Deside Hapara Provizóriu Atividade Pinta “Zebra Cross”

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here