Jogadór Emmanuel FC iha altura ne'ebé dere AC Mamura ho golu úniku. Imajen Mídia LFA

DILI, 11 novembru 2019 (TATOLI) – Jogu kontinuasaun Terseira Divizaun Liga Futeból Amadora (LFA) époka 2019 ne’ebé hala’o iha Kampu Demokrasia, Bairru Formosa, Dili, segunda ne’e, ekipa Emmanuel FC liki AC Mamura ho golu úniku (1-0).

Golu vitória Emmanuel nian prodús hosi jogadór Rivaldo Belo iha minutu 42. Jogu refere dirije hosi árbitru Francisco Pereira, juiz liña Salvadór Cabral no Cárceres dos Reis, árbitru rezerva, Marito Tavares.

Tanba lakon de’it ho golu ida ho adversáriu, asistente treinadór AC Mamura, Arsénio da Silva konfesa katak jogu entre ekipa rua la’o kapa’as tanba hatudu jogu ne’ebé bonitu maibé to’o ikus nia ekipa lakon tanba jogadór ladún kontrola bola ho di’ak.

“Jogu ohin la’o kapa’as tebes. Maibé, ami lakon tanba jogadór sira ladún kontrola bola ho di’ak. Ekipa rua joga hanesan hela,” nia haktuir.

Nia hatutan, iha jogu tuir mai nia ekipa sei hasoru Laleia United FC, tan ne’e nia fiar katak sei manán.

Iha sorin seluk, treinadór Emmanuel FC, Januario de Almeida, sente kontente tanba primeiravez nia ekipa manán ona iha jogu primeiru no fiar katak iha jogu tuir mai sei mantein nafatin vitória.

“Iha jogu tuir mai ami garante manán. Ami kontinua treinu nafatin,” nia haklaken.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here