Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão.

DILI, 11 novembru 2019 (TATOLI) – Deputadu Bankada Frente Revolusionária Timor-Leste Independente (FRETILIN), Joaquim dos Santos ‘Boraluli’, konsidera Proposta Orsamentu Jerál Estadu (OJE) 2020 ho montante biliaun $1,950 orientadu liubá despeza ne’ebé laiha rendimentu, liuliu ba kategoria bens no servisu.

Husi totál orsamentu, bainhira fahe tuir kategoria saláriu no vensimentu millaun $241,271, bens no servisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

“Orsamentu 2020 nian la lori dezenvolvimentu no sei lori de’it maka dezastre ekonómiku tanba Governu orienta liubá despeza sira ne’ebé la lori retornu ekonómiku. Subsídiu sira fó ba ema gasta no laiha rertornu ekonómiku, signifika la fó prioridade ba dezenvolvimentu ekonómiku”, tenik Deputadu Opozisaun ne’e iha resintu Parlamentu Nasionál (PN), segunda ne’e.

Nia halo observasaun, alokasaun orsamentu ba kategoria bens no servisu ba tinan 2020 hamutuk ho montante millaun $703,7, sa’e porsentu 55,4 kompara ho alokasaun orsamentu ba kategória ida-ne’e iha OJE 2019 nian.

Joaquim dehan tan, ezemplu seluk maka partisipasaun Timor-Leste nian iha Expo Dubai ne’ebé sei gasta millaun $2,1.

“Ba para gasta de’it osan, nune’e mós millaun $5 iha Dotasaun ba Governu Tomak hodi selu ba kuota nu’udar membru ba instituisaun internasionál hodi asegura partisipasaun Timor‐Leste nian iha atividade nível rejionál no internasionál”, nia akresenta.

Tuir Deputadu ne’e, alokasaun orsamentu la lori dezenvolvimentu tanba despeza la nesesáriu no boot loos.

“Ha’u ta’uk bele hamosu dezviu orsamentu kuandu osan boot hanesan agora, ministériu sira-nia ema balun ne’ebé iha esperiénsia manobra, bele halo dezviu orsamentu tanba Governu difísil atu kontrola”, nia subliña.

Deputadu ne’e argumenta, perigozu liu kuandu verba orsamentu agregadu ne’ebé alokasaun orsamentu iha fatin diferente maibé tau hamutuk iha fatin ida, hafoin iha nesesidade maka ba hasai.

“Kuandu iha nesesidade maka hasai ne’e ema bele inventa nesesidade. Polítika governasaun labele hanesan ne’e, tenke iha definisaun substánsia hafoin iha asaun konkretu maka bele uza osan”, nia esplika.

Parte seluk, Deputadu Bankada Congresso Nacional da Reconstrução de Timor (CNRT), Domingos de Carvalho, konkorda ho ideia deputadu FRETILIN nian.

“Ne’e klaru, hosi ami Bankada CNRT deside ona katak hakarak ka lakohi tenke halo redusaun. Karik la halo redusaun no sira mantein nafatin maka orsamentu ne’e sei la pasa”, hateten Deputadu Bankada Governu ne’e

Nia rekoñese, haree ba montante orsamentu ne’ebé boot tebes, orsamentu ba tinan oin sei gasta barak liu ba despeza la nesesáriu sira.

Nune’e mós, nia konkorda ho deklarasaun Deputadu FRETILIN ne’ebé maka dehan OJE 2020 sei lori dezastre ekonómiku iha futuru.

Antes ne’e, Ministra Finansa Interina, Sara Lobo Brites, esplika katak montante iha Orsamentu 2020 nian, ba kategoria bens no servisu boot ho totál millaun $738,428 tanba prevee mós atu selu dívida ba kombustível hamutuk millaun $100-resin.

Governante ne’e rekoñese, kategoria ne’e iha duni aumentu iha porsaun boot liu iha tinan ikus atu selu kombustível iha sentrál elétrika Hera no Betano

Dívida mosu tanba iha 2017, orsamenta ba kombustível iha sentrál elétrika rua alokadu de’it ba fulan neen, enkuantu iha fatin hanesan tenke selu husi 2017 to’o 2018, maibé iha 2018 mós la konsege selu kompletu to’o agora maka foin prevee fali iha proposta tinan oin.

Sara Lobo justifika, despeza ne’ebé kontribui mós ba kategoria bens no servisu ho montante aas iha 2020 maka servisu seluk ne’ebé Governu hakarak hadi’a hanesan área saúde no área sira seluk tan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here