Sesaun plenária Parlamentu Nasionál. Imajen/TATOLI

DILI, 11 novembru 2019 (TATOLI) – Iha loron 19 to’o 21 novembru, Parlamentu Nasionál (PN) sei hahú diskusaun no votasaun Proposta Lei Orsamentu Jerál Estadu (OJE) 2020 iha jeneralidade, tanba ne’e Bankada Parlamentár sira hahú dezeña pozisaun polítika, inklui hetan orientasaun husi líder partidu sira.

Deputada Bankada KHUNTO, Olinda Guterres, konfirma Bankada Parlamentár KHUNTO iha ona pozisaun iha diskusaun orsamentu no Bankada prefere Governu redús montante orsamentu tanba boot demais.

“Orientasaun hosi partidu ba ami labele vota kontra, tanba partidu tolu ne’e (CNRT, PLP no KHUNTO) iha uma ida maibé iha dapur ketak-ketak”, tenik Deputada Bankada Governu ne’e iha resintu Parlamentu Nasionál (PN), segunda ne’e.

Tuir Deputada Olinda, kada komisaun ne’ebé elabora relatóriu pareser sei halo análize didi’ak hodi fó hanoin ba Governu kona-ba orsamentu.

Nia hatutan: “Ami Komisaun D sei haruka fila-fali ba Governu, atu nune’e Governu bele hadi’a tiha osan ne’e mak haruka fila-fali mai tanba orsamentu ida ne’e boot luar biasa nian”.

Deputada ne’e konfuzaun ho montante orsamentu 2020 tanba iha tetu fiskál Governu prevee biliaun $1,6, maibé ikus mai hafoin diskusaun Komité Revizaun Orsamentu Polítiku (KROP), montante ne’e sa’e maka’as to’o aprovasaun ikus Governu ba proposta orsamentu iha Konsellu Ministru maka biliaun $1,950.

“Mai iha ne’e (Parlamentu) ami deputadu sira sura kuaze biliaun $2-resin, hafoin ita haree fali ba estrutura governu la kompletu, atu ezekuta oinsá?”, kestiona Deputada Olinda.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here